Кӯлоб. 18-уми июл. ОИ «Азия-Плюс» – Маркази назорати давлатии вогириву беҳдошти минтақаи Кӯлоби вилояти Хатлон дар бозори марказии «Саховат»-и шаҳри Кӯлоб аз 15 дӯкони гӯштфурӯшӣ 3-тоашро баст.
Сардухтури давлатии назорати беҳдошти минтақаи Кӯлоб Саид Давлатов ба ОИ «Азия-Плюс» хабар дод, ки онҳо ба иллати риоя накардани талаботи қоидаҳои беҳдоштӣ, мавҷуд набудани яхдонҳо, ки дар фасли гармо яке аз талаботи асосӣ шуморида мешаванд, баста шудаанд.
«Нархи гӯшт хеле қимат аст ва рӯзона на ҳама вақт пурра фурӯхта мешавад ва муддати тӯлонӣ нигоҳ доштани он дар гармӣ қатъиян манъ карда шудааст», – гуфт ӯ ва афзуд, ки санҷиши дӯконҳои гӯшт дар ҳамаи 10 ноҳияи минтақа оғоз гардидааст ва мунтазам идома хоҳад ёфт.
«Се нафар соҳибони дӯконҳои басташудаи бозори «Саховат» ҳамчунин барои иҷро накардани нишондоди эпидемиологон ба андозаи 180 сомонӣ ҳар яке ҷарима баста шудаанд», – гуфт дар анҷом М.Давлатов.
