Имрӯз, 15-уми апрел мавлуди яке аз саромадони адабиёти муосири тоҷик, Қаҳрамони Тоҷикистон ва яке аз фарзандони барўманди халқи тоҷик, ки дар ташаккули фикри ва адабии халқи тоҷик нақши бориз дошт, Устод Садриддин Айнӣ аст.
Мафсуф ҳамзамон яке аз равшанфикронест, ки дар кушодани мактабҳои тоҷикиву нашри рӯзнома ба забони тоҷикӣ саҳм гузошт ва баъди инқилоби октябр дар рушди маорифи тоҷик ва ҷомеаи нав талош кардааст.
Махсусан, китоби “Намунаи адабиёти тоҷик” ҳамчун китоби тақдирсоз дар таърихи миллати тоҷик сабт шудааст.
Ҳоло дар шаҳри Душанбе Хона-музейи устод пойбарҷост, ки чанд сол пеш "Азия-Плюс" ба суроғи он рафт ва як гузориши муфассал ҳам омода кард, ки ба ифтихори зодрӯзи ин абармарди миллати тоҷик дигарбора пешкаши хонандагон мекунем.
Дар ин навор мудири осорхона Шердил Каримов дар бораи якчанд давраи таърихи ин хонаву зиндагии нависанда дар он, чизҳое, ки имрӯз дар осорхона ҷамъоварӣ шудаанду бахше аз ҳаёти худи Айнӣ мебошанд, масалан, туҳфаи ӯ аз падараш ва танбӯр ё дигар чизҳои ба осорхона туҳфашуда маълумот медиҳад.
Хона-музейи Садриддин Айнӣ соли 1978 ба ифтихори 100-солагии адиб таъсис дода шуд. Ӯ бештари умри худро дар Самарқанд гузаронида, дар шаҳри Душанбе аз соли 1951 то 1954 то дами марг зиндагӣ кардааст. Аҳли оилааш боз чандин сол дар ин хона иқомат доштанд.
Айни замон хона-музей муассисаи давлатии фарҳангӣ буда, дар тавозуни Академияи миллии илмҳои Ҷумҳурии Тоҷикистон қарор дорад.
Соли 2018 ба ифтихори 140-солагии адиб бо дастури президенти ҷумҳурӣ Эмомалӣ Раҳмон хона-музей мавриди таъмиру таҷдид қарор гирифта, дар вазъияти тантанавӣ боз шуд.
Чанд сол пеш шаҳрдории Душанбе пешниҳод намуд, ки Хона-музейи сардафтари адабиёти муосири тоҷик тахриб ё ба ҷойи дигар кӯчонида шавад. Вале баъдтар дар пайи вокуниши аҳли зиё ва фарҳангиёни кишвар ин тасмим бекор карда шуд.
