Душанбе. 30-юми март. ОИ «Азия-Плюс» – Рӯзи 27-уми март бар асари сӯхтор дар манзили беруназшаҳрии худ дар вилояти Маскави Русия яке аз нахустин сарварони нерӯгоҳи Норак Георгий Тихонов дар синни 75-солагӣ ба ҳалокат расид. Тибқи иттилои расонаҳои хабарии Русия, дар хонаи фавтида дар натиҷаи расиши кӯтоҳи ноқилҳо сими барқӣ оташ гирифта, сипас тамоми хонаро сӯхтор фаро гирифтааст. Гуфта мешавад, фавтида кӯшидааст, оташро хомӯш созад, вале ин ба ӯ муяссар нагаштааст. То ҳанӯз дигар сабабҳои фавти Г.Тихонов маълум нест.
Иқтисодчии шинохтаи Тоҷикистон Георгий Кошлаков мегӯяд, саҳми Георгий Тихонов дар рушди бахши энергетикаи ҷумҳурӣ хеле бузург аст. «Солҳои 60-уми қарни гузашта ӯ роҳбарии «Норакгидрострой»-ро ба ӯҳда дошта, ҳамчун пудратчии иншоот фаъолият дошт ва таҳти сарварии ӯ дар корхонаи алюминии тоҷик корҳои сохтмонӣ шурӯъ шуда буданд», – изҳор дошт ӯ.
Имрӯз сафорати Тоҷикистон дар Русия ба наздикону хешовандони марҳум изҳори ҳамдардӣ кард.
