Дар доираи сафари корӣ ба вилояти Суғд президенти Тоҷикистон Эмомалӣ Раҳмон рӯзи 10 феврал дар чорабиниҳо бахшида ба ҷашни Сада дар шаҳри Хуҷанд ширкат варзида, як қатор иншооти нав боз кард ва ба шаш оилаи ниёзманд манзил тақдим кард.
Бино ба иттилои хадамоти матбуоти сарвари давлат, ба ин муносибат дар шаҳри Хуҷанд намоишгоҳ ташкил шуда, гӯшаи аслии онро маҳсулоти ҳунармандии хос ба кишту кор ва деҳқониву чорводорӣ, монанди маҳсулоти оҳангарӣ, маҳсулоти деҳқонӣ, бахусус тухмии зироатҳо, меваҳову полезиҳо ва хушкмеваҳои хоси Тоҷикистон ташкил дод.
Дар намоишгоҳ ҳамчунин асал ва маҳсулоти аз асал омодашуда, маҳсулоти нониву қаннодӣ, таомҳои хос ба халқи тоҷик ҷойгир карда шуд. Дар як қисмати ҷашнгоҳ намоиши бошукӯҳи либосу газворҳо ва матоъҳои миллии тоҷикон, аз қабили алоча, бекасаб, атлас, адрас, чит, сатин ва навъҳои дигари ҳунармандӣ, аз қабили зардӯзӣ, гулдӯзӣ, қолинбофӣ, заргарӣ, бурёбофӣ, сабадбофӣ, армуғонсозӣ ва дигар намуди ҳунарҳо ташкил карда шуд.
Умуман саҳнаи чорабинии идона ба муносибати ҷашни Сада мувофиқи суннатҳои аҷдодӣ оро дода шуда, дар ду гӯшаи он ба таври сунъӣ оташи баланд, ки хос ба ин ҷашни бостонист, афрӯхта шуд.
Ҳамаи инро сокинони 18 шаҳру ноҳияи вилояти Суғд ҳамчун рамзи иттиҳоду сарҷамъии миллат ташкил намуданд.
Пеш аз ин сарвари давлат, дар маросими ифтитоҳи як қатор иншоот дар Хуҷанд иштирок кард: маркази савдо ва хизматрасонии “Амид”,
корхонаи истеҳсоли ширеши “Ширеши Тоҷик” дар ноҳияи Бобоҷон Ғафуров
Дар шаҳри Хуҷанд ҳамчунин ду бинои истиқоматии 9-ошёна мавриди истифода қарор гирифта, президент ба 150 ятими кул тӯҳфа ва ба шаш оилаи эҳтиёҷманд калиди хонаҳои истиқоматӣ тақдим намуд.
Акс ва наворҳои видео аз хадамоти матбуоти президенти Тоҷикистон
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
