Дирӯз, 30-юми октябр, Эмомалӣ Раҳмон, Президенти Тоҷикистон ба Юн Сок Ёл, Президенти Корея дар робита ба қурбониёни издиҳоми шадиди таҷлилкунандагони Ҳэллоуин барқияи изҳори тасаллӣ ирсол намуд.
"Хабари фоҷеабори ҷон бохтан ва осеб дидани шумораи зиёди мардум бар асари сар задани издиҳоми шадид дар яке аз хиёбонҳои марказии шаҳри Сеул боиси андӯҳи амиқи мо гардид.
Дар робита ба ин мусибати гарон ба Шумо, мардуми дӯсти Ҷумҳурии Корея ва пайвандону наздикони фавтидагон таъзияву таслияти самимии ин ҷонибро иброз менамоем ва ба ҳамаи осебдидагон шифои комил хоҳонем",- гуфта мешавад дар барқия.
Ёдовар мешавем, ки як издиҳоми бузурги одамон мехостанд Ҳэллоуинро ҷашн бигиранд, ки дар натиҷаи ин издиҳом ба гузориши расонаҳо 151 нафар кушта ва беш аз 150 нафари дигар ҷароҳат бардоштаанд.
Ба иттилои расонаҳо дар миёни кушташудагон 19 шаҳрванди хориҷӣ низ ҳастанд. Инҳо шаҳрвандони Русия, Чин, Норвегия ва Узбекистон мебошанд.
