Бахши тоҷикии сомонаи гурӯҳи расонаҳои “Азия-Плюс” дар Тоҷикистон яке аз пурхонандатарин пойгоҳҳои хабарӣ боқӣ мемонад. Дар соли 2022 тамоми мундариҷаи сомонаи “Азия-Плюс” 1 миллион хонанда дошт.
Мувофиқи маълумоти “Google Analytics” ва “Yandex.Metrica”, мо 10 маводи пурхонандаи бахши тоҷикии гурӯҳи расонаҳоро барои соли 2022 интихоб кардем.
30 ҷавони муваффақи Тоҷикистон
Хабари дар садри рӯйхати 30 ҷавони муваффақи Тоҷикистон қарор гирифтани Исмоили Зоир, набераи Эмомалӣ Раҳмон ва эълони исми дигар ҷавонони муваффақи кишвар дар соли 2021, ки аз ҷониби Кумитаи ҷавонону варзиши Тоҷикистон омода гардид, дар сомонаи мо 33 ҳазор маротиба хонда шуд.
ИЗОБРАЖЕНИЕ
Посухи Қосими Роҳбар дар бораи беш аз 9 млн доллари марбут ба ӯ
Посухи Қосими Роҳбар, раиси кунунии шаҳри Ҳисор ва раиси собиқи вилояти Суғд дар бораи пайдо шудани беш аз 9 млн доллар дар суратҳисобаш дар яке аз бонкҳои Швейтсария, ки ӯ онро ба теракти моҳи апрели соли 1997 дар шаҳри Хуҷанд рабт доду гуфт, бемору беҳуш буд, ба номаш суратҳисоб кушодаанд, 11,5 ҳазор маротиба мутолиа шудааст.
ИЗОБРАЖЕНИЕ Қосими Роҳбар
Шарҳи Далер Ҷумъа дар робита ба суханронии пурсарусадояш дар Хоруғ
“Суханронӣ дар робита ба ҳаводиси ВМКБ вазифаи ҷониам буд”-, гуфтани Далер Ҷумъа, вазири энергетика ва захираҳои оби Тоҷикистон, ки лидерони ғайрирасмӣ дар ВМКБ-ро ба дахолат ба кори мақомот гунаҳкор ва дар доираи қонун ба ҷавобгарӣ кашидани онҳоро талаб кард, бо қариб 9,5 ҳазор маротиба мутолиа дар рӯйхат дар ҷои сеюм қарор гирифт.
ИЗОБРАЖЕНИЕ Далер Ҷумъа
Даъвати Ато Мирхоҷа аз зодаҳои ВМКБ барои ҳаводиси Хоруғ
Даъвати Ато Мирхоҷа, муовини якуми раиси Иттифоқи нависандони Тоҷикистон аз мансабдорони пешинаву ҳозира, аҳли зиё, вакилон ва шахсиятҳои бонуфузи зодаи ВМКБ дар робита ба муайян кардани мавқеашон оид ба ҳаводиси ВМКБ ва талабаш аз онҳо, ки пинҳон нашаванд, бароянд ва мансабҳоро ҳалол кунанд, 9 ҳазор маротиба хонда шуд.
ИЗОБРАЖЕНИЕ
Ҳалокати Мавлавӣ Муҷибурраҳмон Ансорӣ
Ҳалокати Мавлавӣ Муҷибурраҳмон Ансорӣ, яке аз мубаллиғон ва ҷонибдорони сарсупурдаи Толибон* дар пайи таркиши шадид дар масҷиди шаҳри Ҳироти Афғонистон, ки имоматии намозро ба зимма дошт, 6 ҳазору 400 маротиба мутолиа шудааст.
ИЗОБРАЖЕНИЕ Мавлавӣ Муҷибурраҳмон Ансорӣ
Мусоҳибаи кутоҳ бо Муҳаммадбоқир Муҳаммадбоқиров
Мусоҳибаи кутоҳи телефонии “Азия-Плюс” бо Муҳаммадбоқир Муҳаммадбоқиров, яке аз лидерҳои ғайрирасмии ВМКБ (баъдан кушта шуд), ки Лутфулло Наврӯзов, сардори Раёсати маорифи ин вилоят дар як навори видеоӣ ӯро ба лату кӯб, ҳақорат ва тарк кардани вилоят гунаҳкор мекард, беш аз 6 ҳазор маротиба мутолиа шудааст.
ИЗОБРАЖЕНИЕ
Боздошти мард бо гумони таҷовуз ва қатли духтари ноболиғ
Хабари боздошти як сокини 40-солаи шаҳри Душанбе бо гумони таҷовуз ва қатли духтари ноболиғ дар ҳолати мастӣ ва пинҳон кардани ҷасад дар байни рахти кӯрпаҳо, ки баъди 10 рӯз пайдо гардид, дар бахши тоҷикии мо 6 ҳазор маротиба хонда шуд.
ИЗОБРАЖЕНИЕ
Муаррифии Раҳим Саидзода, вазири нави маориф ва илми Тоҷикистон, ки баъди танқиди соҳаи маориф аз сӯи президент таъйин гардид, яке аз пурхонандатарин хабарҳои мо дар соли равон буд. Онро қариб 6 ҳазор маротиба хонданд.
ИЗОБРАЖЕНИЕ Раҳим Саидзода
Тамдиди муҳлати азнавбақайдгирии симкортҳо
Тамдиди муҳлати азнавбақайдгирии симкортҳо бо шиносномаҳои нав (ID-корт) то 15-уми феврали соли 2023, ки байни ҷомеа баҳсҳои гармро ба миён овард, дар бахши тоҷикии гурӯҳи расонаҳои “Азия-Плюс” 5 ҳазору 800 маротиба мутолиа гардид.
ИЗОБРАЖЕНИЕ
Баҳси Абдуқодир Талбаков бо домулло Абдураҳими Қазоқонӣ
Тасмими ба додгоҳ кашидан ва 1 млн сомонӣ товон талаб кардан аз домулло Абдураҳими Қазоқонӣ, яке аз имомхатибони шинохтаи Душанбе аз сӯи Абдуқодир Талбаков, рӯзноманигор ва мудири Китобхонаи Лоҳутии пойтахт, ки мавзуъҳои ҳасоси диниро ба баҳс мекашад, дар 10-гонаи пурхонандатарин хабарҳои мо дар ҷои охир қарор гирифт. Онро 5 ҳазору 300 маротиба мутолиа карданд.
ИЗОБРАЖЕНИЕ Абдураҳими Қазоқонӣ ва Абдуқодир Талбаков
PS: Хонандагони гиромӣ, умедворем, соли шумо низ бобарор гузашт, натиҷаҳои онро хуб ҷамъбаст карда, хулоса ва нақшаҳои соли ояндаатонро маълум кардед. Бо мо бимонед, ваъда медиҳем, ки шуморо аз охирин ва муҳимтарин хабарҳои Тоҷикистон ва ҷаҳон огоҳ хоҳем кард.
Моро дар Telegram, Facebook, Instagram, OK ва ВК пайгирӣ кунед.
