Имрӯз, 30-юми май, бахшида ба Рӯзи байналмилалии ҳифзи кӯдакон дар Душанбе намоиш – фурӯши 160 номгӯй китоби рангаи бачагона бо 50 дарсад тахфиф оғоз ёфт. Ҳамзамон, рӯзи 1-уми июн барномаи фарҳангию фароғатӣ таҳти шиори “Кӯдакон – ҷаҳони мо!” дар пойтахти кишвар ба нақша гирифта шудааст.
Тавре хабаргузории “Ховар” менависад, намоиш-фурӯши китобҳо аз ҷониби Ташкилоти ҷамъиятии байналмилалии “Истиқбол” дар саҳни маҷмааи “Шарқи Озод” ба роҳ монда шудааст.
“Ҳадаф аз баргузории намоиш – ҷалби насли наврас ба мутолиаи китоб, ташаккули беҳтарин малакаи хониш, баланд бардоштани сатҳи фарҳанги иттилоотии кӯдакон ва ба ин васила дар замири онҳо тарбия намудани ҳисси ифтихори миллӣ, ватандӯстиву худогоҳӣ, гиромидошти арзишҳои милливу умумибашарӣ ва тарғиби тарзи ҳаёти солим мебошад”, – гуфтааст манбаъ.
Дар рӯзи аввали намоиши мазкур адибону олимон, дӯстдорони китобу толибилмон иштирок намуда, дар бораи аҳамияти китобу китобхонӣ изҳори назар карданд.
Таъкид мешавад, ки дар ин маъракаи фарҳангӣ дар баробари хариди китоб ҳамзамон, хонандагон имкон пайдо мекунанд, ки бо шоирону нависандагони шинохтаи тоҷик ҳамсуҳбат гардида, аз онҳо соядаст низ гиранд.
Ҳамин тавр, бахшида ба Рӯзи байналмилалии ҳифзи кӯдакон соати 18:00-и рӯзи 1-уми июн дар “Боғи кӯдакона”-и пойтахт барномаи фарҳангию фароғатӣ таҳти шиори “Кӯдакон – ҷаҳони мо!” баргузор мешавад.
ИЗОБРАЖЕНИЕ
Дар рафти барнома намоиши маҳсули эҷодии кӯдакону наврасони муассисаҳои таҳсилоти иловагии шаҳру навоҳии пойтахт ва бозиҳои ҷолиб барои кӯдакон ба нақша гирифта шудааст.
Ғолибон ва иштирокчиёни фаъоли мусобиқаҳои интеллектуалӣ, маърифатӣ ва варзишӣ бо диплом, ифтихорнома ва тӯҳфаҳои хотиравӣ қадрдонӣ мешаванд.
Бояд гуфт, ки 1-уми июн дар саросари ҷаҳон ҳамчун Рӯзи байналмилалии ҳифзи кӯдакон ҷашн гирифта мешавад. Ин яке аз муҳимтарин ҷашнҳои байналмилалӣ мебошад, ки соли 1925 дар конфронси байналмилалӣ оид ба беҳбуди зиндагии кӯдакон дар Женева (Швейтсария) тасдиқ шудааст.
Рӯзи байналмилалии ҳифзи кӯдакон дар Тоҷикистон низ бар асоси Қонуни Ҷумҳурии Тоҷикистон "Дар бораи рӯзҳои ид" таҷлил мегардад.
