Имрӯз, 26-уми октябр, Президенти Тоҷикистон Эмомалӣ Раҳмон ҷиҳати шиносоӣ бо ҷараёни корҳои ободонию созандагӣ, вусъати кишти тирамоҳӣ ва ифтитоҳи якчанд иншооти гуногуни иқтисодиву иҷтимоӣ ба ноҳияи Рӯдакӣ сафар намуд.
Дар ин бора хадамоти матбуоти сарвари давлат хабар медиҳад.
Зимни ин сафар дар деҳаи Сароби деҳоти Зайнабобод корхонаи парандапарварии “Ҳилол” ба истифода дода шуд, ки дар он асосан парвариши мурғи марҷон, кабк ва фазан ба роҳ монда шудааст.
Дар шаҳраки Сомониён бинои иловагии Муассисаи таҳсилоти миёнаи умумии рақами 3-ро мавриди баҳрабардорӣ қарор дода шуд, ки аз се ошёна иборат буда, барои 1240 ҷойи нишаст дар ду баст пешбинӣ гардидааст.
Ҳамзамон, сарвари давлат баъди таҷдиду навсозӣ Боғи фарҳангию фароғатии ноҳияи Рӯдакиро ба истифода дод. Масоҳати умумии боғ 3,5 гектарро ташкил дода, дар он беш аз 800 бех дарахтони ороишию сояафкан шинонида шудааст.
Дар ин боғ роҳбари давлат бо зиёда аз 60 нафар ятимони кулл мулоқот ва ба онҳо туҳфаҳо тақдим намуд.
Инчунин, дар доираи ин сафар бинои маъмурии Кумитаи иҷроияи Ҳизби халқии демократии Тоҷикистон дар ноҳияи Рӯдакӣ мавриди истифодабарӣ қарор дод, ки он аз се ошёна иборат мебошад.
Дар деҳоти Чоргултеппа корхонаи истеҳсоли пойафзоли ҶДММ “Сарҷамъ” ба истифода дода шуд. Ин корхона дар майдони 0,32 гектар бунёд шуда, дар як рӯз 500 ҷуфт пойафзол истеҳсол мекунад.
Раиси ҷумҳур дар баробари ба истифода додани иншооти таъиноти гуногун ҳамзамон аз фаъолияти хоҷагии деҳқонии “Ҳосила”-и деҳоти Чоргултеппа дидан намуд.
Ҳамчунин, Эмомалӣ Раҳмон дар ин ноҳия бо лоиҳаи муфассали банақшагирии ҷамоатҳои шаҳраки Сомониён, Мирзо Турсунзода, Навобод, деҳоти Роҳатӣ ва Чортеппа шинос гардид.
Гуфта мешавад, ки дар асоси нақшаи генералӣ қисми аввали нақшаи муфассали банақшагирии шаҳраки Сомониён дар масоҳати 79,6 гектар барои зиёда аз 19 ҳазор нафар таҳия шудааст.
Дар доираи ин лоиҳа бунёди биноҳои истиқоматии баландошёна, 4 муассисаи таълимӣ, 8 кӯдакистон барои то 400 кӯдак, мактаби мусиқӣ, меҳмонхонаҳо, гулгаштҳо, варзишгоҳ бо 20 ҳазор ҷои нишаст, майдонча ва толорҳои варзишӣ, навсозии бозори “Ганҷ”, биноҳои маъмурӣ, бинои ёрии таъҷилӣ дар назди беморхонаи марказӣ, беморхона барои касалиҳои дил, навсозии Қасри фарҳанг, васеъкунии роҳҳо ва ғайра ба нақша гирифта шудааст.
