Ду омӯзгори Донишгоҳи давлатии ҳуқуқ, бизнес ва сиёсати Тоҷикистон (ДДҲБСТ) барандаи ҷоизаҳои “Беҳтарин муҳаққиқ” ва “Беҳтарин корманди илмӣ”-и давлатҳои узви Иттиҳоди Давлатҳои Мустақил дар соли 2023 эълон шудаанд. Дар ин бора шуъбаи таҳлил ва робита бо ҷомеаи ин донишгоҳ хабар медиҳад.
Ба иттилои манбаъ, Мавлуда Асророва – номзади илмҳои иқтисодӣ, мудири шуъбаи магистратура, омодакунии кадрҳои илмӣ ва илмӣ-педагогии ДДҲБСТ миёни олимони кишварҳои узви ИДМ “Беҳтарин корманди илмӣ – 2023” дониста шудааст.
“Асророва дар лоиҳаи байналмилалӣ бо пешниҳоди мақолаи илмӣ миёни иштирокчиёни муассисаҳои мамолики узви ИДМ ширкат карда, ба дипломи дараҷаи I, нишони сарисинагӣ ва шаҳодатнома соҳиб гардид”, – омадааст дар хабар.
Ҳамзамон, Аълохон Бобозода – омӯзгори факултети технологияҳои инноватсионӣ ва баҳисобгирии бухгалтерии ДДҲБСТ байни муҳаққиқони давлатҳои аъзои ИДМ сазовори ҷоизаи “Беҳтарин муҳаққиқ – 2023” гардидааст.
ИЗОБРАЖЕНИЕ
Ин дастовардро омӯзгор бо пешниҳоди мақолаи илмӣ байни иштирокчиёни муассисаҳои мамолики аъзои Иттиҳоди Давлатҳои Мустақил соҳиб шудааст. Ба Бобозода дипломи дараҷаи l, нишони сарисинагӣ ва шаҳодатнома супорида шудааст.
Гуфта мешавад, ки озмуни мазкур моҳи ноябри соли 2023 дар шаҳри Остонаи Қазоқистон байни мутахассисони муассисаҳои илмӣ-таълимии кишварҳои узви ИДМ баргузор гардид. Дар он аз тамоми муассисаҳои илмӣ-таълимии давлатҳои ИДМ намояндагон тариқи онлайн иштирок карданд.
