Фирӯза Эшматова, ваколатдори ҳуқуқи инсон (Омбудсмен)-и Ӯзбекистон дар робита ба таҳқири муҳоҷирони кории ӯзбекистонӣ дар шаҳри Екатеринбург ба ҳамтои русиягии худ Татяна Москалкова шикоят кардааст.
Эшматова дархост карда, ки ҳуқуқи кории муҳоҷирони Ӯзбекистон дар Русия риоя ва таъмин карда шавад.
Ниҳодҳои қудратии ноҳияи Железнодорожнийи Екатеринбург 17 январ дар як сохтмон "рейд" гузаронида, ҷамъан санадҳои 150 нафарро тафтиш карданд. Аз миёни онҳо 8 кас барои нақзи қонунҳои муҳоҷират аз Русия ихроҷ шуда, ба 4 нафар, ки шаҳрвандии ин кишварро доштаанд, даъватнома ба комиссариати ҳарбӣ супурда шудааст.
Аксу видеои нашршуда дар интернет нишон медиҳад, маъмурони ҳифзи ҳуқуқи Русия муҳоҷиронро маҷбур менамоянд, ки пайи ҳамдигар дар майдони барфпӯши сохтмон ҳаракат кунанд.
Дар миёни муҳоҷирон шаҳрвандони Ӯзбекистон низ будаанд ва ин манзара норозигии Тошкандро ба бор овардааст.
