Мақомоти Тоҷикистон хабари гуреза шуда, ба Душанбе омадану ба кумаки моддӣ ниёз доштани “шаҳрвандони Фаластин”-ро бардурӯғ хонда, ин қазияро шарҳ доданд.
Чанд рӯз инҷониб дар шабакаҳои иҷтимоӣ аксҳое интишор шудаву давр мезананд, ки гӯё як оила аз Фаластин гуреза шуда, ба Тоҷикистон омадаанд ва ба онҳо паноҳандагии Тоҷикистон дода шудааст. Инчунин, гуфта мешавад, ки ин оилаи фаластинӣ ба кумак эҳтиёҷ доранд.
Раёсати ВКД дар Душанбе бар ин хабар вокуниш карда, гуфт, паноҳанда шудани шаҳрвандони Фаластин дар Тоҷикистон асоси воқеӣ надорад.
“Шаҳрвандоне, ки дар расмҳои нашргардида инъикос ёфтаанд, аъзои як оила буда, зодагони давлати шоҳигарии Урдун мебошанд, ки ба Тоҷикистон ҳамчун сайёҳ омадаанд”, – шарҳ додааст РВКД дар Душанбе.
Ба иттилои манбаъ, аз ҷониби кормандони милитсия ба ин оила раҳнамоиҳои ҳуқуқӣ расонида шудааст.
Дар ин баробар, муайян карда шудааст, ки “онҳо бо меҳмонхона ва ҳамаи лавозимоти зарурӣ таъмин буда, ба кӯмаки моддӣ эҳтиёҷ надоранд”.
Ёдовар мешавем, ки то инҷониб аксаран шаҳрвандони Афғонистон ба Тоҷикистон гуреза шуда меомаданд ва аз кишвари мо паноҳандагӣ мехостанд. Ин аз камтарин ҳолатҳоест, ки шаҳрвандони кишварҳои арабӣ ба Тоҷикистон гуреза мешаванд ва ин ҳолат ҳам ҳоло аз сӯи мақомоти Тоҷикистон рад карда мешавад.
