Ба 7 афсару сарбозе, ки дар низоъи марзӣ миёни Тоҷикистону Қирғизистон барои ҳифзи марзу бум ҷон доданд, пас аз марг ҷоизаи “Шуҷоат ва ҷавонмардӣ” дода шуд.
Ин ҷоиза аз ҷониби Кумитаи кор бо ҷавонон ва варзиш дар соли 2023 ба 13 нафар тақдим гашт, ки 7 нафари онҳо дар низоъи марзии миёни Тоҷикистону Қирғизистон ҷон додаанд.
Дилошӯб Розиқзода, як масъули тақдими ҷоизаҳои Кумитаи кор бо ҷавонон ва варзиш ба “Азия-Плюс” гуфт, барои гирифтани ҷоизаи “Шуҷоат ва ҷавонмардӣ” аз ҷониби вазорату идораҳои дахлдор наздики 80 пешниҳод омада буд.
Ба гуфтаи ӯ, аз миёни ҳама пешниҳодҳо доварон аз рӯи корнамоии нишондодаашон ба 13 нафар ҷоизаи мазкурро тақдим карданд.
“Ҷоизаи “Шуҷоат ва ҷавонмардӣ” ба сарбозону афсароне дода шуд, ки дар роҳи ҳифзи марзу бум ҷон доданд, ҷони касеро наҷот бахшиданд ё ба ин монанд корнамоии шоён анҷом доданд”, – гуфт ҳамсӯҳбати мо.
Розиқзода гуфт, ки Кумитаи кор бо ҷавонон ва варзиш 3 сол инҷониб ҷоизаи мазкурро эҳдо мекунад ва солҳои оянда низ он давом хоҳад кард.
Афсарону сарбозоне, ки дар низоъи марзии миёни Тоҷикистону Қирғизистон ҷон дода, бо ҷоизаи “Шуҷоат ва ҷавонмардӣ” қадрдонӣ шуданд:
1. Абдулҳаев Шуҳрат Ҷумъахонович – сарбози қаторӣ аз Вазорати мудофиаи Тоҷикистон;
2. Муминов Салоҳиддин Алохонович – сарбози қаторӣ аз Вазорати мудофиаи Тоҷикистон;
3. Қаюмов Мансур Абдусаломович – Афсари мерганти гуруҳи якуми қисми ҳарбии 3505-и Қушунҳои дохилии Ҷумҳурии Тоҷикистон;
4. Султонов Ҳодихон Сироҷиддинович – ваколатдори оперативии Шуъбаи Вазорати корҳои дохилӣ дар шаҳри Исфара;
5. Одинаев Муҳаммадҷон Ҳусейнович – сарбози қаторӣ аз Қӯшунҳои сарҳадии Кумитаи давлатии амнияти миллии Ҷумҳурии Тоҷикистон;
6. Солеҳов Назрулло Баёнович – сарбози қаторӣ аз Вазорати мудофиаи Ҷумҳурии Тоҷикистон;
7. Набизода Ҷамшед Асомиддин – муовини камандир оид ба техника ва аслиҳаи ҷангии қисми ҳарбии 3502-и Қӯшунҳои дохилии Вазорати корҳои дохилии Тоҷикистон.
Дигар нафароне, ки корнамоии шоён анҷом додаанд:
8. Зикруллозода Раҳмоналӣ Маҳмадҷон –сарбози қаторӣ аз Вазорати мудофиаи Ҷумҳурии Тоҷикистон;
9. Муратов Аблувалӣ Абдурауфҷонович – хизматчии ҳарбии қисми ҳарбии 0215-и Қушунҳои сарҳадии Кумитаи давлатии амнияти миллии Ҷумҳурии Тоҷикистон;
10. Раҷабов Фарҳод Азизмадович – хизматчии ҳарбии қисми ҳарбии 0307 Қушунҳои сарҳадии Кумитаи давлатии амнияти миллии Ҷумҳурии Тоҷикистон;
11. Мирзоев Аслиддин Оқилҷонович – корманди гурӯҳи 2- юми Дастаи махсуси зудамали наҷотдиҳӣ дар минтақаи Рашти Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;
12. Муҳиддинов Орзумурод Аҳлиддинович – афсари калони Раёсати хадамоти таъиноти махсусгардонидашудаи кофтуковӣ – наҷоддиҳии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон;
13. Файзалиев Муҳаммад Маҳмадиевич – курсанти Донишкадаи олии сарҳадии Кумитаи давлатии амнияти миллии Ҷумҳурии Тоҷикистон.
Ёдовар мешавем, ки қаблан барои пос доштани ному ёди афсарону сарбозони дар муноқишаи марзӣ миёни Тоҷикистону Қирғизистон ҷонбохта чанд кӯча, ҷамоат ва мактабҳо номгузорӣ шуда буд.
