Дар минтақаҳои алоҳидаи Ноҳияҳои тобеи ҷумҳурӣ, вилояти Суғд ва ғарби ВМКБ хавфи омадани сел дар маҳалҳо боқӣ мемонад.
Ҳамзамон дар ноҳияҳои ҷанбу ғарб ва марказӣ, баъзе ноҳияҳои тобеи марказ ва шаҳри Душанбе ҳавои чангу ғуборолуд пешгӯӣ мешавад. Дар ин бора Агентии обуҳавошиносии ҷумҳурӣ хабар медиҳад.
Ҳодисаҳои омадани сел рӯзҳои 11-12 июл ва ҳавои чангу ғуборолуд то 14 июл пешбинӣ шудааст. Ин метавонад боиси олудагии ҳавои атмосфера бо маводи муаллақи (гарду ғубор) ҳиссачаҳои андозаи 10 мкр (Pm-10) ва 2,5 мкр (Pm-2,5) гардад.
Дар ин робита Кумитаи ҳолатҳои фавқулодаи ҷумҳурӣ аз аҳолӣ хоҳиш мекунад, ки ба беморони гирифтори бемориҳои дилу раг, диабети қанд ва гипертония таваҷҷӯҳи хоса зоҳир намоянд.
Кумита зарурати зуд-зуд бо латтаи намнок тоза кардани манзили истиқоматӣ ва дар ҳолати зарурӣ пӯшидани ниқобҳои тиббиро хотиррасон намуда, ба сокинон тавсия медиҳад, ки то ҳадди имкон аз сафарҳо ба минтақаҳои хатар, ҷамъоварии ҳезум ва доруворӣ худдорӣ кунанд.
Ҳамчунин аз аҳолӣ хоҳиш мешавад, ки ҳангоми ҳаракат аз тариқи роҳҳи кӯҳиву ағбаҳо эҳтиёткор буда, саривақт селроҳаҳо, ҷӯву каналҳои назди хонаҳои худро аз ҳар гуна хасу хошоку сангу рег тоза кунанд.
Дар ҳамин ҳол, бино ба маълумоти қисми навбатдории Кумита, шоми 10 июл дар қаламрави шаҳри Исфара борони пуршиддат ва жола борид. Дар натиҷа дар қаламрави ҷамоати Чоркӯҳ сел омад.
Заминҳои кишоварӣ, пули роҳҳои маҳаллаҳои Говсувор ва Чоркӯҳро об зер кард. Боришоти зиёд ба ҷамоати деҳоти Сурх, Кӯлканд ва Чилгазии Исфара низ хисорот ворид кардааст. Талафоти ҷонӣ нест.
Гуфта мешавад, барои муайян намудани ҳаҷми азрари расида ва роҳандозии корҳои бартарафсозии паёмадҳои офат Комиссияи ҳолатҳои фавқулоддаи шаҳр фаъолият дорад.
