Дар пайи як садамаи мудҳиши нақлиётӣ дар ноҳияи Хуросон як нафар ҷон бохта, нӯҳ сокини дигар ҷароҳат бардоштаанд.
Кумитаи ҳолатҳои фавқулода ва мудофиаи гражданӣ иттилоъ медиҳад, ки ҳодиса дирӯз, 18-уми август, дар роҳи ҳудуди Хуросони роҳи Душанбе – Бохтар рух додааст.
“Соатҳои 10:30 ба вақти маҳаллӣ мошини боркаши “Ҳино” таҳти идораи сокини 33-солаи ноҳияи Вахши вилояти Хатлон ҳангоми ҳаракат дар роҳи Душанбе-Бохтар дар даромадгоҳи ҳудуди ноҳияи Хуросон бинобар аз кор мондани василаи нигоҳдории мошин ба садама дучор шудааст. Дар натиҷа ронанда ва 8 сокини дигар ҷароҳатҳои вазнини ҷисмонӣ бардошта, дар беморхона бистарӣ гардидаанд. Як нафар дар ҷои ҳодиса ба ҳалокат расидааст”, – менависад ин ниҳод.
Дар наворҳое, ки дар шабакаҳои иҷтимоӣ паҳн гардиданд, дида мешавад, ки мошини боркашони “Дулан” дар наздикии нуқтаи фурӯши сӯзишворӣ ба чанд мошини худрав бархӯрдааст.
Ҳамчунин гуфта мешавад, дар натиҷаи садама 7 воситаи нақлиёт зарар дидаанд.
Бояд гуфт, дар нимсолаи аввали соли ҷорӣ дар Тоҷикистон 539 ҳодисаи садамаи нақлиёт (соли 2023 – 492 ҳодиса) рух дода, бар асари онҳо 236 нафар ҳалок ва 570 нафар ҷароҳат бардоштаанд. Дар муқоиса бо ҳамин давраи соли гузашта шумори ҳодисаҳо 11,8%, теъдоди ҷабрдидагон 13,3% ва ҳалокшудагон 22,3% зиёд шудааст.
