Ҳаракати автобусҳо байни шаҳрҳои Хуҷанд ва Новосибирск бори дигар барқарор шуд. Хатсайри мазкур бинобар пандемияи Covid-19 муваққатан қатъ гардида буд, ки бо ташаббуси соҳибкорони тоҷик ва рус дубора барқарор шуд.
Ин хатсайри мусофирбариро якҷоя ҶСК “Сорбон”, “Новосибирскгортранс” ва соҳибкори инфиродӣ Исоҳоҷиев ташкил мекунанд.
Дар ҶСК “Сорбон” ба “Азия-Плюс” хабар доданд, ки сафарҳо ҳар ду рӯз як маротиба анҷом дода мешаванд ва Сафари аввал аллакай пагоҳ ба нақша гирифта шудааст.
Сафари аввал барои 14-уми январ ба нақша гирифта шудааст. Тибқи ҷадвал, автобус аз Хуҷанд соати 22:20 ба роҳ мебарояд ва пас аз 50 соату 30 дақиқа ба Новосибирск мерасад.
Аз Новосибирск низ сафарҳо ҳар ду рӯз як маротиба сурат мегиранд ва автобус соати 10:25 ба роҳ мебарояд.
Роҳкиро аз ҷониби Тоҷикистон 1000 сомонӣ ва аз ҷониби Русия 9 ҳазор рубли русӣ аст.
Ба гуфтаи ширкати мазкур, ғайр аз Новосибирск, автобусҳои онҳо ҳоло аз Хуҷанд ба Тюмен ва Сургут низ равуо мекунанд.
Тибқи ҷадвал, автобусҳо ба Тюмень соати 20:00 рӯзҳои душанбе ва панҷшанбе ба роҳ мебароянд.
Хатсайри Хуҷанд – Сургут бошад, рӯзҳои ҷумъа ва якшанбе соати 16:40 ба роҳ мебароядд. Автобусҳое, ки аз Русия меоянд, дар истгоҳи мусофирбарии “Роҳи абрешим” дар маҳаллаи 34-уми шаҳри Хуҷанд таваққуф мекунанд.
“Барқарор шудани ин хатсайрҳо робитаҳои нақлиётиро байни Тоҷикистон ва Русия мустаҳкам намуда, сафар барои мусофирони ҳар ду кишварро осон мекунад”, – таъкид кард намояндаи ҶСК “Сорбон”.
Бояд гуфт, ки оғози ин хатсайри автобус ҳанӯз моҳи ноябри соли 2024 эълон шуда буд. Ин масъала дар “Ҳафтаи нақлиёт” дар шаҳри Москва дар доираи гуфтушунидҳо миёни вазирони нақлиёти Русия Роман Старовойт ва Тоҷикистон Азим Иброҳим баррасӣ шуда буд.
Дар ҷараёни мулоқоти дуҷониба вазирон нақшаҳои кушодани дигар хатсайрҳои автобусӣ аз Тоҷикистон ба Русияро низ баррасӣ карданд.
Азим Иброҳим, вазири нақлиёти кишвар зарурати барқарор намудани ҳаракати қатораҳо байни Душанбе ва Москва (ҳоло қатораҳо танҳо то Волгоград мераванд) ва кушодани хатсайрҳои байналмилалии автобусӣ, аз қабили “Бохтар – Москва”, “Хуҷанд – Қазон”, “Хуҷанд – Москва” ва “Хуҷанд – Екатеринбург”-ро таъкид намуд.
Ёдовар мешавем, ки хатсайри байни Душанбе ва Москва соли 2023 тавассути ширкати “Asian Express” дубора ба роҳ монда шуда буд. Аммо айни замон он муваққатан қатъ гардида, гуфта мешавад, ки дар фасли баҳор дубора фаъол хоҳад шуд.
