Дар нахустин иҷлосияи парлумони нав – даъвати ҳафтум, ки бо иштироки Эмомалӣ Раҳмон, раиси ҷумҳури Тоҷикистон баргузор гардид, Файзалӣ Идизода раиси парлумони Тоҷикистон интихоб шуд.
Файзалӣ Идизода вакил аз ҳавзаи интихоботии Рашт буда, тариқи овоздиҳии пинҳонӣ ва бо раъйи ҳама вакилон раис интихоб гардид.
Шермуҳаммад Шоҳиён, раиси пешини Додгоҳи олии Тоҷикистон муовини якуми раиси парлумон интихоб шуд.
Мавсума Муинӣ, вакил аз ҳавзаи интихоботии Хуҷанд, ки дар даъвати қаблӣ ҳам барои муддате муовини раиси Маҷлиси намояндагон буд, бори дигар муовини раис интихоб шуд.
ИЗОБРАЖЕНИЕ
Азиз Гиёзода аз ҳавзаи интихоботии Хоруғ муовини дигари раиси Маҷлиси намояндагон интихоб шуд.
Эмомалӣ Раҳмон, раисҷумҳури Тоҷикистон дар суханронии худ вакилони нави парлумони кишварро бо интихоб шуданашон дар ин мақоми баланд табрик гуфта, таъкид кард, ки “тамоми кӯшишу талош ва донишу таҷрибаи худро ба он равона созанд, ки ба эътимоди мардуми кишвар сазовор бошанд”.
ИЗОБРАЖЕНИЕ
Дар ин баробар аз вакилон талаб кардааст, ки “барои амалӣ кардани барномаи пешазинтихоботии худ саъю талош намоянд, зимни қабули қонунҳо ва ҳалли дигар масъалаҳо манфиати ҷомеа, давлат ва шаҳрвандонро меҳвари фаъолияти хеш қарор диҳанд, инчунин барои рушди устувори иқтисодиву иҷтимоии кишвар ва болоравии сатҳи некуаҳволии сокинони мамлакат содиқона кӯшиш намоянд”.
Ёдовар мешавем, ки ҳайати вакилони Маҷлиси намояндагон даъвати ҳафтум зимни интихоботе, ки 2-юми марти соли ҷорӣ баргузор шуд, интихоб гардиданд. Ҳайати пешин бошад, дирӯз пас аз баргузории охирин ҷаласа пароканда шуд.
