Аз 6-уми май имкон мешавад, ки натиҷаи дархости худро дар бозии лотерея барои дарёфти Green Card санҷид. Он аз 5-уми октябр то 8-уми ноябри соли 2022 баргузор гардида буд.
Имсол тоҷикистониён имкон пайдо карданд, ки бо шиносномаи Тоҷикистон дар бозии лотерея иштирок кунанд. Қаблан барои пешниҳоди дархост доштани шиносномаи хориҷӣ зарур буд.
Ғайр аз ин, аз соли ҷорӣ ба шаҳрвандони Тоҷикистон дигар лозим нест, ки дар сурати бурд барои дарёфти раводид (виза) ба берун аз ҳудуди ҷумҳурӣ раванд. Онҳо раводиди ИМА-ро дар сафорати ин кишвар дар Душанбе гирифта метавонанд. Пеш барои гирифтани раводид шаҳрвандони Тоҷикистон бояд ба Қазоқистон рафта, онро дар сафорати ИМА дар Алмато дастрас мекарданд.
Аз матлаби таҳиянамудаи мо шумо дар бораи чӣ гуна санҷидани натиҷаҳои бозии лотерея ва ба доми қаллобон наафтодан дар сурати пирӯзӣ маълумоти муфид пайдо карда метавонед.
Натиҷаҳоро дар куҷо метавон санҷид?
Ҳар кадоме аз иштирокчиёни бозӣ метавонад мустақилона муайян кунад, ки раводиди муҳоҷирати амрикоиро бурд кардааст ё не. Мақоми худро метавонед дар бахши махсуси сомонаи Департаменти давлатии ИМА бо суроғаи https://dvprogram.state.gov бисанҷед.
Инро чӣ гуна метавон анҷом дод?
Тугмаи «Check Satus»-ро пахш кунед. Барои санҷиш ворид намудани рақами тасдиқшудаи иштирокчии лотерея (Confirmation Number), инчунин зикри насаб (фамилия) ва соли таваллуди дархосткунанда дар равзанаи бозшуда зарур аст.
Дигар тарзҳои санҷиш ҳам ҳаст?
Ин ягона тарзи санҷидани натиҷаҳои лотерея мебошад. Департаменти давлатӣ ба шумо дигар ягон мактуби одӣ ё электронӣ намефиристад.
Агар ман анкетаро дар ширкатҳои хусусӣ пур карда бошам чӣ?
Фарқ надорад, ки шумо чӣ гуна ба “грин-корт” дархост додед – бо ёрии ширкат ё ташкилот барои пур кардани анкета (пурсишнома) ё мустақилона.
Онҳо ҳам натиҷаҳоро аз рӯи рақами тасдиқшудаи иштирокчӣ дар ҳамон бахши сомонаи Департаменти давлатӣ месанҷанд. Агар шумо худатон санҷида натавонед, пас метавонед аз хидмати ҳамон ширкатҳое, ки тариқи онҳо дархост дода будед, истифода баред.
Чӣ мебояд кард, агар рақами тасдиқшударо гум карда бошам?
Дар сомонаи Низоми электронии санҷиши мақоми иштирок дар лотерея https://dvprogram.state.gov/ESC/CheckStatus.aspx рақами тасдиқшударо барқарор кардан мумкин аст.
Барои ин пахш ба Forgot Confirmation Number ва ворид намудани маълумоти шахсӣ, суроғаи почтаи электронӣ, ки шумо онро ҳангоми бақайдгирӣ нишон додаед, зарур аст.
Бозии интихоби дархостҳои Green Card, ки дар соли 2022 пешниҳод шудаанд, моҳи майи соли 2023 баргузор шуда, дарёфт ва анҷоми расмиёти он танҳо дар соли 2024 имконпазир аст.
Агар тариқи почта дар бораи бурд дар “грин-корт” мактуб гирифта бошам чӣ?
Агар Шумо тариқи е-мейл дар бораи бурди дархостатон дар лотерея огоҳинома гирифта бошед, пас ба гумони ғолиб (дар 99,9%-и ҳолатҳо) ин қаллобӣ аст.
Қаллобон мехоҳанд, ки бо роҳи фиреб пули шуморо гиранд, зеро дар мактуб онҳо маъмулан талаб мекунанд, ки ба суратҳисобашон маблағ гузаронида шавад. Дар хотир доштан лозим аст, ки муассисаи расмӣ ҳеҷ гоҳ гузаронидани маблағро дархост намекунад.
Тариқи почтаи электронӣ Шумо танҳо аз Департаменти давлатӣ бо ёдоварии ба санҷиши натиҷаҳои худ имкон доштанатон мактуб гирифта метавонед.
Чӣ хел мефаҳмам, ки бурд кардаам
Агар шумо бурд карда бошед, чунин саҳифаро мебинед:
ИЗОБРАЖЕНИЕ
Агар дархости шумо бурд накарда бошад, шумо чунин хабарро мебинед:
ИЗОБРАЖЕНИЕ
Ба ҷуз бурд дар лотерея, барои муҳоҷират ба ИМА боз ягон талаботи иловагии дигар низ ҳаст?
Ҳамчунин донистан лозим аст, ки гирифтани огоҳинома дар бораи бурди “грин-корт” ҳоло гирифтани онро ба дархосткунанда кафолат намедиҳад.
Барои муҳоҷират ба ИМА ба ҳамаи талаботе, ки аз довталабони раводиди муҳоҷират тақозо мешавад, ҷавобгӯ будан лозим аст.
ТАВАҶҶУҲ!
Бо сабаби теъдоди хеле зиёди хоҳишмандони санҷиш, сомонаи www.dvprogram.state.gov баъзан кушода намешавад ё аз кор бозмеистад. Аз ин рӯ, кӯшиш кунед, ки онро дубора кушода, боз бисанҷед.
Ғолибони лотереяи Green Сard ҳуқуқ пайдо мекунанд, ки ба таври қонунӣ дар Амрико зиндагӣ кунанд.
Ҳар сол Департаменти давлатии ИМА тавассути лотерея ба шаҳрвандони кишварҳое, ки мизони муҳоҷирати таърихан паст ба ИМА доранд, аз ҷумла ба Тоҷикистон, 50 000 раводиди иқомати доимӣ (грин-корт – корти сабз) медиҳад.
Ҳар сол тақрибан 14 миллион нафар аз саросари дунё дар ин барнома иштирок мекунанд.
