Бегоҳии дирӯз, 19-уми май, дар як бинои Вазорати мудофиаи Тоҷикистон сӯхтор сар задааст. Дар ин бора Сарраёсати хадамоти оташнишонӣ хабар медиҳад.
Ба гуфтаи манбаъ, ин ҳодиса соати 16:42 дақиқа рух додааст.
Сарраёсати хадамоти оташнишонӣ гуфтааст, ки сӯхтор “дар натиҷаи расиши кӯтоҳи ноқилҳои барқӣ дар сехи хурди барқтаъминкунии Вазорати мудофиа” сар зада, 50 метри мураббаъро фаро гирифтааст.
Ба гуфтаи манбаъ, оташнишонҳо сари вақт сӯхторро хомӯш кардаанд.
Мақомот гуфтаанд, ки дар пайи ин ҳодиса талафоти ҷонӣ сабт нашудааст. Вале зарари расида аз ин оташсӯзӣ чӣ қадар будааст, маълум нест.
Сӯхторҳои ба сабаби “расиши кӯтоҳи ноқилҳои барқӣ” рухдода дар Тоҷикистон яке аз мушкилоти умда ба шумор мераванд. Дар гузашта низ дар чандин муассисаҳои давлатӣ, корхонаҳо, бозорҳо ва биноҳои истиқоматӣ бо сабаби “расиши кӯтоҳи ноқилҳо” сӯхтор ба қайд гирифта шуда буданд.
Дар ин замина, ниҳодҳои масъули кишвар ҳамеша таъкид мекунанд, ки ҳама биноҳо бояд чораҳои пешгирикунандаро риоя намуда, системаи огоҳсозии сӯхторро насб ва таҷдид кунанд.
