Дар вохӯрии ҳайати Бонки миллии Тоҷикистон (БМТ) бо намояндагони Бонки федералии Олмон (Бундесбанк), ки дар ҷараёни сафари онҳо ба яке аз филилаҳои он дар Мюнхен сурат гирифт, масоили назорати сифати пулҳои коғазӣ в мубориза бо пулҳои қалбакӣ дар маркази таваҷҷуҳи мулоқот қарор доштанд.
Ба иттилои шуъбаи матбуоти БМТ, ҳайат таҳти роҳбарии раиси Бонки миллӣ Фирдавс Толибзода бо технологияҳои муосири равандҳои коркард, низомҳои амниятӣ ва интиқоли пули нақд аз наздик шинос шуд.
Гуфта мешавад, дар ҷраёни сафар Фирдавс Толибзода бо президенти шуъбаи минтақавии бонки мазкур дар Бавария Райнхолд Фолбрахт ва директори шуъбаи минтақавии бонки номбурда дар шаҳри Мюнхен хонум Мишел Кройссер мулоқот дошт.
Ба иттилои манбаъ, сафар дар доираи таҳкими муносибатҳои дуҷониба ва табодули таҷриба байни бонкҳои марказӣ сурат гирифта, дар ҷараёни боздид, ба фаъолияти маркази хазинавӣ таваҷҷуҳи хосса зоҳир карда шуд.
“Дар идомаи ташриф намояндагони Бундесбонк ба ҳайати Бонки миллии Тоҷикистон доир ба технологияҳои муосири равандҳои коркард, низомҳои амниятӣ ва интиқоли пули нақд маълумоти муфассал пешниҳод намуда, масъалаҳои марбут ба назорати сифати банкнотаҳо ва мубориза бо пулҳои қалбакӣ мавриди баррасӣ қарор дода шуданд”, – омадааст дар хабар.
Фирдавс Толибзода аз фароҳам овардани имкони шиносоӣ бо таҷрибаи пешрафта ва муҳимияти он барои такмили минбаъдаи фаъолияти Бонки милли ҷумҳурӣизҳори қаноатмандӣ намуд:
«Мо ҳамкориро бо ҳамкасбони олмонии худ ниҳоят қадр мекунем ва итминон дорем, ки таҷрибаи андӯхташуда ба такмили минбаъдаи фаъолияти мо, бахусус дар масъалаҳои танзиму назорати гардиши пул ва таъмини амнияти он мусоидат хоҳад кард».
Дар навбати худ, роҳбарияти филиали Бонки федералии Олмон дар шаҳри Мюнхен низ аҳаммияти ҳамкориҳои байналмилалиро барои нигоҳ доштани суботи низоми молиявӣ таъкид намуд.
Зикр мегардад, ки дар фарҷоми боздид, ки дар фазои хуби ҳамдигарфаҳмӣ гузашт, ҷонибҳо омодагии худро барои рушди минбаъдаи муносибатҳои шарикӣ ва идомаи табодули таҷриба дар самтҳои калидии фаъолияти бонкҳои марказӣ баён намуданд.
