Муҳиддин Асадуллоев, паҳлавони 19-солаи тоҷик дар мусобиқоти қаҳрамонии ҷудои ҷаҳон миёни ҷавонон медали тилло ба даст овард. Ӯ тавонист корномаи ду ҷудокори шинохтаи тоҷикро такрор кунад.
Ӯ дар вазни то 73 кг куштӣ гирифта, дар марҳилаи ниҳоӣ муқобили Рюсей Аракава аз Ҷопон пирӯзӣ ба даст овард.
То ин марҳила, Муҳиддин Асадуллоев дар даври аввал озод буд, дар даври дуюм бар Кай Уоллес аз Амрико пирӯз гардид. Баъдан Муҳриддин Маъруфовро аз Ӯзбекистон мағлуб карда, ба чорякфинал баромад.
Ӯ баъди ғалаба бар Абдусалом Белбелҳоут аз Алҷазоир ба нимфинал роҳ ёфт ва дар даври ниманиҳоӣ бар Кейто Киҳараи ҷопонӣ дастболо шуд.
ИЗОБРАЖЕНИЕ
Ҳамин тавр, Муҳиддин Асадуллоев корномаи Сомон Маҳмадбеков ва Эмомалӣ Нуралиро такрор карда, сеюмин ҷудокор аз Тоҷикистон шуд, ки дар қаҳрамонии ҷаҳон миёни ҷавонон медали тило гирифт.
Ҳамакнун, варзишгарони тоҷик аз қаҳрамонии ҷудои ҷаҳон миёни ҷавонон бо як медал ба ватан бармегарданд.
Ин мусобиқа дар шаҳри Лимаи кишвари Перу ҷараён дорад. Тоҷикистонро дар он 4 варзишгар намояндагӣ карданд. Се нафари онҳо – Икром Шамсов дар вазни то 60 кг, Ёсин Бобокалонов ва Эҳсон Сафарзода (ҳарду) дар вазни то 66 кг дар рӯзи аввали мусобиқа дар марҳилаҳои гуногун ноком шуда, аз медалҳо бенасиб монданд.
