Барои ширкат дар нишасти сарони кишварҳои Итиҳоди давлатҳои мустақил (ИДМ), ки рӯзи 10-уми октябр дар Душанбе доир мешавад дар назар аст, ҳудуди 10 сарони давлат ба Тоҷикистон оянд:
Владимир Путин, раисҷумҳури Русия;
Илҳом Алиев, раисҷумҳури, Озарбойҷон;
Никол Пашинян, нахуствазири Арманистон;
Александр Лукашенко, раисҷумҳури Белорус;
Қосимҷомарт Тоқаев, раисҷумҳури Қазоқистон;
Содир Ҷабборов, раисҷумҳури Қирғизистон;
Сардор Бердимуҳаммадов, раисҷумҳури Туркманистон;
Шавкат Мирзиёев, раисҷумҳури Ӯзбекистон.
Аз ВКХ гуфтанд, дар нишаст раҳбарони давлатҳои ИДМ масъалаҳои амнияти минтақаиву ҷаҳонӣ, таҳкими гуфтугӯи сиёсӣ, тақвияти ҳамкории тиҷоративу иқтисодӣ ва густариши ҳамкории башардӯстона ва фарҳангӣ дар доираи иттиҳодро баррасӣ мекунанд.
Дар охири ҷаласа имзои созишномаҳо дар назар аст.
Ҳамчунин, рӯзҳои 8 ва 9-уми октябр сафари давлатии Владимир Путин, раисҷумҳури Русия ба Тоҷикистон дар назар аст.
ИЗОБРАЖЕНИЕ
Ба гуфтаи ВКХ дар ҷараёни сафари давлатӣ музокирот дар сиғаҳои "як ба як" ва бо ҳайатҳои васеъ баргузор мегарданд, инчунин имзои ҳуҷҷатҳои байнидавлатӣ ва байниҳукуматӣ пешбинӣ шудааст.
Баъди анҷоми вохӯриҳо, нишасти матбуотии раисҷумҳурҳои Тоҷикистон ва Русия баргузор мегардад.
Дар доираи ин сафар, рӯзи 9-уми октябр дар Душанбе мулоқоти раисҷумҳурҳои Тоҷикистон, Қазоқистон, Қирғизистон, Туркманистон, Ӯзбекистон ва Русия дар доираи формати “Осиёи Марказӣ – Русия”-доир мешавад.
Ба иттилои манбаъ, дар он масъалаҳои ҳамкории бисёрҷониба, ҳамоҳангсозии чорабиниҳои мубориза бо терроризм, экстремизм, гардиши ғайриқонунии маводи мухаддир ва дигар чолишҳои фаромиллӣ муҳокима мешаванд.
Аз натиҷаи ин нишаст Баёния ва Нақшаи амалиёти муштарак қабул хоҳад шуд.
Дар ин рӯз, ҷаласаи Шӯрои вазирони корҳои хориҷии ИДМ низ баргузор мешавад. Дар он тақвияти ҳамкории бисёрҷониба ва таъмини амният ва рушди устувор мубодилаи афкор хоҳанд кард.
Бояд гуфт, ки дар остонаи баргузории чорабиниҳио байналмилалӣ, чораҳои амниятӣ дар пойтахтии кишвар сахт шуда, бархе роҳҳои ташрифотӣ, масҷидҳо ва бозору марказҳои калони савдо дар шаҳри Душанбе давоми 3 то 6 рӯз баста мешаванд.
