Дар ҷаласаи навбатии ҳукумати кишвар, ки дирӯз, 31-уми октябр баргузор шуд, таъкид гардид, ки Буҷети давлатии Тоҷикистон барои соли 2026 ба ҳаҷми 65 миллиард сомонӣ пешбинӣ шуда, он нисбат ба буҷети соли равон 31,2% зиёд мебошад.
Ба иттилои хадамоти матбуоти сарвари давлат, ин рақам нисбат ба буҷети тасдиқшудаи соли 2025-ум 15,5 миллиард сомонӣ бештар буда, ба 33,3% маҷмӯи маҳсулоти дохилӣ (ММД) баробар аст.
Файзиддин Қаҳҳорзода, вазири молия дар гузоришаш таъкид кардааст, ки лоиҳаи буҷет хусусиятҳои фарқкунанда дошта, дар он як қатор муқаррароти нав ва тағйирот низ пешбинӣ шудааст.
ИЗОБРАЖЕНИЕ Файзиддин Қаҳҳорзода
44% буҷет ба соҳаҳои иҷтимоӣ
Ба навиштаи манбаъ, барои соҳаҳои иҷтимоӣ, аз ҷумла маориф ва тандурустӣ 29,5 миллиард сомонӣ ҷудо карда шудааст. Ин рақам 44 дарсади ҳаҷми умумии хароҷоти буҷет ё 15,1 фоизи ММД-ро ташкил медиҳад.
“Барномаи қарзгирии берунаи давлатӣ 52 созишномаи қарзӣ, аз ҷумла 36 созишномаи амалкунанда ва 16 созишномаи дар сатҳи мувофиқасозӣ қарордоштаро дар бар мегирад”, – менависад хадамот.
Ҳадаф аз таҳияи барнома, ба навиштаи хадамот, амалӣ кардани назорати дахлдор дар самти ҷалби маблағҳои қарзии хориҷӣ ва роҳ надодан ба андӯхти назоратнашавандаи қарзи берунӣ мебошад.
Супоришҳои раисҷумҳур
Эмомалӣ Раҳмон, раисҷумҳури кишвар дастур додааст, ки барои афзун кардани даромад ба буҷет чораҳои зерин андешида шавад:
– Тезонидани раванди рақамикунонӣ;
– Гузаштан ба пардохтҳои ғайринақдӣ дар ҳама соҳаҳо;
– Истифодаи васеи технологияҳои муосир дар гузаргоҳҳои сарҳадию гумрукӣ.
ИЗОБРАЖЕНИЕ Эмомалӣ Раҳмон
Дар маҷлис, ҳамчунин, "Барномаи давлатии рушди илмҳои риёзӣ, дақиқ ва табиӣ барои солҳои 2026-2030 тасдиқ шудааст". Раҳим Саидзода, вазири маориф ва илм таъкид кардааст, ки барнома барои идома бахшидан ба дастгирӣ ва рушди илм, баланд бардоштани самаранокии таҳқиқот ва татбиқи технологияҳои инноватсионӣ таҳия гардидааст.
Ҳамчунин, пешниҳоди ба категорияи шаҳрак мансуб донистани деҳаи Тавилдара, омодагӣ ба Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” баррасӣ шудааст.
Дар идома, таъсиси “Маркази татбиқи лоиҳаи сохтмони Нерӯгоҳи барқи обии Хуталон” тасдиқ шудааст.
Эмомалӣ Раҳмон, ҳамчунин, барои дар сатҳи баланд гузаронидани чорабиниҳо дар давраи зимистон, ҷамъоварии меваю сабзавот, захираи кофии маводи хӯрока ва сӯзишворӣ ва вусъати корҳои созандагӣ ба истиқболи 35-солагии Истиқлоли давлатӣ дастур додааст.
