Идораи Хадамоти федералии амнияти Русия (ФСБ) дар вилояти Перм аз ихроҷи “як зодаи Осиёи Марказӣ” бо гумони “содир кардани амалҳое, ки ба амнияти Русия таҳдид мекунанд", хабар додааст.
Ҳарчанд ин ниҳод дар мавриди нафари ихроҷшуда иттилои бештаре надодааст, вале расонаҳои русӣ, аз ҷумла, “Коммерсант”, рӯзи 30-юми декабр навиштааст, ки ин фард Сайфиддин Одинаев, раиси ҷамъият ё диаспораи тоҷикон дар вилояти Перми Русия ва зодаи Тоҷикистон аст.
Ин ниҳод ҳамчунин, гуфтааст, ки ӯ аз шаҳрвандии Русия маҳрум ва вурудаш ба муддати 50 сол ба ин кишвар манъ шудааст.
Мақомоти Русия мушаххас нагуфтаанд, ки кадом амалҳои ӯ “ба амнияти Русия таҳдид мекунанд”, ки боиси аз шаҳрвандӣ маҳрум ва аз Русия ихроҷ шуданаш гардид.
Назари Одинаев дар робита ба ин қазия маълум нест.
Ба навиштаи расонаҳои Русия, Сайфиддин Одинаев соли 2014 бо иттиҳоми “роҳзанӣ” 11 моҳ ҳабс шудааст. Ӯ ба он муттаҳам мешуд, ки аз як ҳамватани худ талаб кард, ки телефони мобилиро ба ӯ диҳад ва вақте ки посухи рад гирифт, аз дасти ҷабрдида телефонро бо зӯрӣ гирифт. Бо назардошти мӯҳлати боздошти пешакӣ, ӯ тақрибан се моҳ дар ҳабс буд.
Маълум нест, ки худи ӯ дар ин маврид чӣ назар дорад.
Ин бори аввал нест, ки як роҳбари ҷамъияти тоҷикон дар Русия аз шаҳрвандӣ маҳрум ва аз ин кишвавр ихроҷ мешаванд. Аз ҷумла, Русия соли 2017 Каромат Шарипов, роҳбари ҳаракати умумирусиягии "Муҳоҷирони меҳнатии тоҷик” аз ин кишвар ихроҷ ва шаҳрвандиашро бекор карда буд.
Ӯ баъд аз як рӯзи қабули ҳукми Додгоҳи Маскав ба Тоҷикистон баргашт. Додгоҳ Шариповро ба он гунаҳкор кард, ки шаҳрвандии Русияро ғайриқонунӣ ба даст овардааст. Худи ӯ гуфта буд, ки ихроҷаш фармоишӣ аст ва “фаъолияти густардаи ӯ дар самти ҳимояи муҳоҷирон ба ихроҷаш аз Русия сабаб шудааст”.
Дар солҳои охир, Каромат Шарипов дар зодгоҳаш шаҳри Ваҳдат зиндагӣ мекард. Ӯ 9-уми майи соли 2020 аз сактаи қалб даргузашт.
Ҳамчунин, дар соли 2021, Иззат Амон, раиси Маркази тоҷикон дар Русия ба "фаъолияти ғайриқонунӣ" гунаҳкор ва бо қарори Додгоҳи ноҳияи Твери шаҳри Маскав аз ин кишвар ихроҷ шуд.
Иззат Амон рӯзи 25-уми март дар Русия нопадид шуд ва баъдан ВКД Тоҷикистон гуфт, ӯро дар Душанбе боздошт ва алайҳи ӯ бо гумони "қаллобӣ ба миқдори махсусан калон" (қисми чаҳори моддаи 247-и Кодекси ҷиноӣ) парванда боз кардааст. Ӯ аввал бо ин модда 9 сол ва як сол пас, бо иттиҳоми "қаллобӣ" 6 соли дигар зиндон шуд.
