Мақомоти Эрон мегӯянд, дар пайи эътирозҳои ахир дар ин кишвар 3 ҳазору 117 тан ҷон бохтаанд, ки аз ин 2 ҳазору 427 шаҳрванди оддиву кормандони нерӯҳои амниятӣ ва 690 “террорист ва шӯришгар” будаанд.
Аббос Масҷидӣ, раиси Созмони пизишки қонунии Эрон дар гузорише дар Телевизиони давлатии Эрон (IRIB) дар ин бора иттилоъ дода гуфтааст, ки "миёни ҷонбохтагон теъдоди зиёде роҳгузарон, занону кӯдакон ва пиронсолон буданд".
Ин дар ҳолест, ки расонаҳои хориҷӣ бо такя ба созмонҳои берун аз Эрон ва манобеи дигари худ теъдоди ҷонбохтагонро бештар нишон медиҳанд. Аз ҷумла, як созмони эронии Фаъолони ҳуқуқи башар (HRANA), ки дар ИМА воқеъ аст, рӯзи 22-юми январ хабар дод, ки шумораи қурбониён ҳадди аққали ин эътирозҳо 4 ҳазору 902 нафарро ташкил медиҳад
Алиакбар Пурҷамшедиён, дабири Шӯрои амнияти Эрон ҳам дар ин гузориш гуфтааст, ки даргириҳо дар 400 шаҳристон, аз ҷумла дар 100 минтақаи шаҳри Теҳрон рух додааст.
Инчунин, ӯ зикр кард, ки дар пайи даргириҳо, 305 мошини ёрии таъҷилӣ ва автобус, 24 маркази сӯзишворӣ, беш аз 700 мағоза, 300 хонаи истиқоматӣ, 750 бонк, 414 идораи давлатӣ, 749 мошини пулис ва нерӯҳои амниятӣ, 200 мактаб, даҳҳо китобхона, 350 масҷид, 1 калисо, 253 истгоҳи автобус, 800 мошини шахсии мардум, 89 ҳавзаи илмӣ, 120 пойгоҳи басиҷ хисорот диданд.
Ҳамзамон, ба гуфтаи ӯ, даҳҳо ҳазор ҷилд китоб, аз ҷумла “Қуръон”-ро дар хиёбонҳо сӯзондаанд.
Бояд гуфт, эътирозҳо дар Эрон поёни моҳи декабри соли гузашта дар пайи уфти арзиши пули риёл (пули миллии Эрон) ва афзоиши таваррум оғоз шуд ва чанд рӯз давом кард. Дар пайи даргириҳо интернет дар Эрон қатъ шуда, маълум нест, ки вазъ ҳоло дар дохил чӣ гуна аст.
Роҳбарияти Эрон ба ҳақи эътироз доштани сокинон таъкид карда, аммо аз дахолати “дасти хориҷа” ҳушдор дода буданд. Роҳбари ин кишвар гуфта буд, бо эътирозгарон суҳбат мекунем, аммо бо шӯришгарон мубориза мебарем.
Аббос Ароқчӣ, вазири корҳои хориҷии Эрон 12-уми январ дар дидор бо сафирони муқими ин кишвар гуфта буд, эътирозҳо сулҳомез буданд ва ҳукумат бо тоҷирон ва ҷонибҳои манфиатдор музокиротро оғоз карда буд, вале “гурӯҳҳои террористии мусаллаҳ барои дур кардани тазоҳурот аз роҳи асосии онҳо ба сафи эътирозгарон ворид шуданд. Мо далелҳои тирпарронӣ ба неруҳои амниятӣ дорем, ки ҳадафи он афзоиши шумораи қурбониён аст”.
Шоми 11-уми январ ҳукумати Эрон барои се рӯз “ба поси хотири шаҳидони набарди муқовимати миллии эрониён” мотами миллӣ эълон карда буд.
Ҳоло дарёфти иттилоъ аз сарчашмаҳои алтернативӣ дар дохили Эрон маҳдуд буда, маълум нест, ки вазъ дар ҳоли ҳозир дар дохили ин кишвар чӣ гуна аст.
Талаби эътирозгарон дар Эрон чист ва роҳбарони ин кишвар ба онҳо чӣ посух доданд, дар ин маводи "Азия-Плюс" хонед: "Масоили иҷтимоӣ ё дасти хориҷӣ? Талаби эътирозгарон дар Эрон ва посухи роҳбарони ин кишвар ба онҳо".
