Дар шаҳри Душанбе нархи миёнаи 1 метри мураббаи хона ба 8 ҳазору 207 сомонӣ ё 877 доллар расидааст, ки ин нисбат ба аввали соли гузашта ҳудуди 3% зиёд аст.
Дар ин бора имрӯз, 29-уми январ Низом Мирзозода, раиси Кумитаи меъморӣ ва сохтмони кишвар дар посух ба саволи хабарнигори “Азия-Плюс” иттилоъ дод.
“Ҳоло нархи миёнаи 1 метри мураббаи хона ба 8 ҳазору 207 сомониро ташкил медиҳад. Инро дуруст фаҳмед, мо аз ин ҳам баландтар хона дорем, 2 ҳазор дорем (манзур 2 ҳазор доллар аст- аз идора), боз дар қисматҳои ошёнаҳои боло аз ин арзон – 600-700 доллар хона дорем”,-иброз дошт Мирзозода.
Ин дар ҳолест, ки ӯ моҳи феврали соли 2025 гуфта буд, дар Душанбе арзиши миёнаи як метри мураббаъ хона 780 доллар (тақрибан 8 ҳазору 643 сомонӣ, ба қурби онвақтаи доллар) мебошад.
ИЗОБРАЖЕНИЕ Низом Мирзозода
Низом Мирзозода иддао кард, ки дар миёни кишварҳои собиқ Иттиҳоди шӯравӣ нархи миёнаи хона дар Тоҷикистон арзонтарин аст. Ба қавли ӯ, нархи миёнаи хона дар Тоҷикистон аз 5 ҳазор сомонӣ боло аст.
Ӯ гуфт, ки нархи миёнаи 1 метри мураббаи хона дар шаҳри Хуҷанд 5350 сомонӣ, шаҳри Ҳисор 4650 сомонӣ, шаҳри Кӯлоб 4 ҳазор сомонӣ, шаҳри Ваҳдат 5 ҳазор сомонӣ, шаҳри Турсунзода 4500 сомонӣ ва дар шаҳри Бохтар 4 ҳазор сомонӣ мебошад.
Раиси Кумитаи сохтмон афзуд, соли гузашта нархи манзил дар шаҳри Душанбе ба ҳисоби миёна 2,8% боло рафтааст ва баръакс дар шаҳри Хуҷанд 2,9 %, Кӯлоб 8,5% ва Бохтар 12% паст шудааст.
Ин ниҳод се сол қабл нархи як метри мураббаъ хонаро дар пойтахт 4 ҳазору 170 сомонӣ гуфта буд. Яъне давоми се соли охир арзиши хона дар Душанбе бештар аз ду баробар зиёд шудааст.
Ӯ изҳор дошт, ки корхонаи “Маркази нархгузорӣ дар соҳаи сохтмон” дар се моҳ як маротиба мониторинг гузаронида, нархи хонаҳоро муайян карда пешниҳод мекунад”.
Мирзозода моҳи феврали соли гузашта дар нишасти хабарӣ гуфта буд, ки соҳибкорон дар гузоштани нарх озоданд, “вале инсоф ҳам даркор аст”.
Тибқи омори Кумитаи меъморӣ ва сохтмон, дар соли 2025-ум ҳаҷми сармоягузорӣ ба рушди асосӣ аз ҳисоби ҳамаи манбаъҳои маблағгузорӣ 28 миллиарду 736 миллион сомониро ташкил додааст, ки нисбат ба ҳамин давраи соли 2024-ум 123 дарсадро ташкил медиҳад.
Дар ин муддат дар масоҳати 2 млн 127 метри мураббаъ хонаҳои истиқоматӣ ба истифода дода шудааст, ки нисбат ба соли 2024-ум 122,3%-ро ташкил медиҳад. Инчунин дар ин давра 28 ҳазору 11 иншоот ба истифода дода шуда, сохтмони 2 ҳазору 499 иншоот идома доштааст.
Бояд гуфт, ки аксари сокинон аз гаронии нархи хонаҳо дар кишвар, махсусан дар шаҳри Душанбе нигаронӣ мекунанд ва таъкид менамоянд, ки ҳарчанд шумораи сохтмони хонаҳо дар кишвар зиёд мешавад, вале сол аз сол нархи онҳо гарон мешавад. Инчунин сокинон ҳамасола аз сифати сохтмони хонаҳо, дер супурдани бино, як хонаро ба чанд кас фурӯхтан, таъмину обу барқ дар бино низ шикоят мекунанд.
