Соли 2025 дар Тоҷикистон 280 ҳазор ҷойи корӣ таъсис таъсис дода шуд, ки аз чор як ҳиссаи онро ҷойҳои кории доимӣ ташкил медиҳанд. Дар ин бора Солеҳа Холмаҳмадзода, вазири меҳнат, муҳоҷират ва шуғли аҳолии Тоҷикистон зимни нишасти матбуотӣ хабар дод.
Ӯ иттилоъ дод, ки аз шумори умумии ҷойҳои кории таъсисёфта 74 ҳазор ё худ 26,2%-и онҳо ҷойҳои кории доимианд. Ҳудуди 50 ҳазор ҷойи кории муваққатӣ ва 152,2 ҳазор ҷойи кории мавсимӣ таъсис дода шудаанд.
Ба гуфтаи вазир, чунин сохтори шуғл ба вобастагии боқимондаи бозори кор аз шаклҳои мавсимӣ ва мувақққатии ҷойҳои корӣ, бахусус дар бахши кишоварзӣ ва соҳаи хидматрасонӣ ишора мекунад.
"Дар ҳамин ҳол, қисмати зиёди ҷойҳои корӣ аз ҳисоби дастгирии соҳибкорон таъсис дода шудааст. Ба шаҳрвандони барои роҳандозии фаъолияти истеҳсолӣ, савдо ва пешниҳоди хидматрасонӣ кумакпулӣ дода шуд, ки ба шуғли мустақилона (инфиродӣ) ва дарёфти манбаъҳои даромади нав имкон дод", – гуфт вазири меҳнату муҳоҷират.
Ба иттилои вай, ғайр аз ин, соли 2025 дар соҳаи саноат, сохтмон ва сайёҳӣ афзоиши талабот ба қувваи корӣ ба қайд гирифта шудааст. Вазир гуфт, "имрӯз ширкатҳои ватанӣ ҷойҳои корӣ пешниҳод намуда, сатҳи музди меҳнат дар онҳо аз ширкатҳои хориҷӣ кам нест".
Соли гузашта, мақомоти мақомот, дар зиёда аз 10 ҳазор корхонаву ташкилот 929 ярмаркаи ҷойҳои кории холӣ гузаронида, корхонаву муассиса ва ташкилоту хоҷагиҳо зиёда аз 15 ҳазор ҷойҳои корӣ ба шаҳрвандони бекор пешниҳод шудааст.
Ин дар ҳолест, ки дар кишвар норасоии қувваи кории соҳибтахассус (ҳирфаӣ) вуҷуд дорад ва дар ҷойҳои корие, ки дастрасанд, аксаран музди меҳнати паст пешниҳод мешавад. Аз ин рӯ, бисёре аз шаҳрвандони Тоҷикистон ба он намераванд ва дар хориҷа кор ҷустуҷӯ мекунанд.