Дар соли 2025 дар Тоҷикистон ба маблағи 66,7 млрд сомонӣ (зиёда аз 7,1 млрд доллар) маҳсулоти саноатӣ истеҳсол шудааст, 13,3 млрд сомонӣ (беш аз 1,4 млрд доллар) зиёдтар нисбат ба соли 2024 аст. Дар ин бора рӯзи 11 феврал зимни нишасти матбуоти ҷамъбасти соли гузашта вазири саноат ва технологияҳои нави Тоҷикистон Шералӣ Кабир хабар дод.
Ба гуфтаи ӯ, Тоҷикистон аз рӯйи нишондиҳандаи рушди истеҳсоли маҳсулоти саноатӣ миёни кишварҳои Иттиҳоди давлатҳои мустақил (ИДМ) дар соли 2025 дар ҷойи аввал қарор гирифта, нишондиҳандаи мазкур аз Қирғизистон 10% зиёдтар мебошад.
Қазоқистон, Ӯзбекистон, Русия, Арманистон, Озарбойҷон ва Беларус суръати нисбатан камтар нишон дода, дар кишварҳое ба мисли Озарбйҷон ва Беларус ҳатто нишондиҳандаи манфӣ ба қайд гирифта шудааст.
Дар сохтори умумии саноати Тоҷикистон соҳаи кӯҳкорӣ ва истихроҷи маъдан, ки 40,3%-ро ташкил медиҳад, дар мавқеи аввал қарор дорад.
Дар идома аз рӯйи аҳаммият саноати хӯрокворӣ (18,6%), истеҳсоли нерӯи барқ (17,2%), мошинсозӣ (7,9%) ва истеҳсоли масолеҳи сохтмон (6,2%) ҷойгир шудаанд.
Вазир ба рушди саноати коркард, ки аз ҳаҷми умумии истеҳсол 51,8% ба он рост меояд, таваҷҷуҳи хосса зоҳир кард. Дар ин соҳа саҳми маҳсулоти кимиёвӣ бо рушди 26,1%, истеҳсоли резин ва пластмасса – 16,1%, маҳсулоти нассоҷӣ ва дӯзандагӣ – 14,4%, инчунин дорусозӣ бо рушди 10,6% низ назаррас аст.
