Душанбе. 13-уми апрел. ОИ «Азия-Плюс» – Рӯзи шанбеи ҳафтаи гузашта вазири корҳои хориҷии ҶТ Ҳамрохон Зарифӣ, ки бо сафари корӣ дар шаҳри Ашқобод қарор дошт, озими шаҳри Теҳрон гашта, бо вазири корҳои хориҷии Эрон, доктор Манучеҳри Муттақӣ гуфтушунид кард.
Чӣ тавре ки аз департаменти иттилооти Вазорати ВКХ ҶТ ба ОИ «Азия-Плюс» хабар доданд, дар вохӯрӣ масоили дурнамои ҳамкориҳои дуҷониба мавриди баррасӣ қарор гирифта, ҷонибҳо ба масъалаи анҷоми пурраи сохтмони нақби «Истиқлол», суръат бахшидан ба корҳои сохтмонӣ дар нерӯгоҳи «Сангтӯда-2», таҳияи заминаи фанниву техникии сохтмони роҳи оҳани Шерхон-Бандар – Мазори Шариф – Ҳирот – Машҳад ва ҷудо кардани қарз ба Тоҷикистон таваҷҷӯҳи хос зоҳир сохтанд
«Зимни гуфтушунид атрофи масоили густариши ҳамкориҳои иқтисодиву тиҷоратӣ ва дигар масоили мавриди таваҷҷӯҳи тарафайн табодули афкор сурат гирифт», – афзуд манбаъ.
Нимаи дуввуми рӯз Ҳамрохон Зарифӣ ба ватан баргашт.
