Душанбе. 2-юми март. ОИ «Азия-Плюс» – Дар шаҳри Душанбе реҷабандии истифодаи барқ, ки аз 27-уми январ ҷорӣ гардида буд, ба охир расид. Шурӯъ аз 27-уми феврал ба пойтахт шабона низ барқ бидуни маҳдудият интиқол дода мешавад.
Тавре аз ширкати «Барқи тоҷик» ба ОИ «Азия-Плюс» хабар доданд, чунин иқдом ба туфайли барқарор сохтани транзити интиқоли барқи Туркманистон тавассути низоми энергетикии Ӯзбекистон ва интиқоли барқи истеҳсоли Ӯзбекистон ба ҷумҳурӣ муясаар гаштааст.
Ба иттилои манбаъ, феълан ҷиҳати афзоиши ҳаҷми интиқоли барқ ба манотиқи кишвар ҳукумати ҷумҳурӣ реҷаи интиқоли онро таҳия месозад. «Агар мо захираҳо пайдо намоем, табиист, ки ҳаҷми интиқоли барқ ба минтақаҳоро зиёд хоҳем кард, вале аллакай шурӯъ аз имрӯз баҳри сабуктар гардонидани реҷабандии истифодаи барқ дар минтақаҳо чораҳо андешида мешаванд», – гуфт манбаъ.
Айни замон шабонарӯзӣ ба Тоҷикистон ҳудуди 13 млн. кВт/соат нерӯи барқ ворид мегардад, ки беш аз 10 млн. кВт/соаташ ба Туркманистон рост омада, боқимонда барқи Ӯзбекистон мебошад. Дар дохили ҷумҳурӣ шабонарӯзи гузашта 19,7 млн. кВт/соат нерӯи барқ истеҳсол гардид. Феълан мизони ҷоришавии об ба обанбори нерӯгоҳи Норак 166 метри мукааб дар як сонияро ташкил медиҳад. Сатҳи об дар обанбори бузургтарини ҷумҳурӣ айни замон 858,19 метрро ташкил медиҳад.
