Душанбе. 24-уми феврал. ОИ «Азия-Плюс» – Раиси Асссостсиатсияи миллии сиёсатшиносони Тоҷикистон Абдуғанӣ Мамадазимов бар чунин назар аст, ки бо сафари президенти Тоҷикистон ба Маскав дар муносиботи Тоҷикистону Русия марҳилаи нав шурӯъ мегардад.
Дар сӯҳбати ихтисосӣ бо хабарнигори ОИ «Азия-Плюс» сиёсатшинос изҳор дошт, ки муносиботи дуҷонибаи Русияву Тоҷикистон акнун нишонаҳои воқеъгароёна ва оқилонаро касб карда, назардошти манфиати миллӣ дар меҳвари муносибот қарор хоҳад дошт. «Муносибот чунинанд, ки ҷонибҳо ба ҳамкории дуҷониба шадидан ниёз доранд», – гуфт ӯ.
Сиёсатшиноси тоҷик аз рӯйдодҳои зимни сафари президенти Русия ба Ӯзбекистон рухдода ёдовар шуда, мегӯяд, акнун ҳама чиз возеҳ гардид ва ҷонибҳо эҳсосоти худро изҳор дошта, ҷой танҳо барои ҳамкории мушаххас ва ба ҳарду ҷониб судманд боқӣ мондааст. «Аз ин рӯ, мо аз такони ҷиддӣ дар роҳандозии ҳамкориҳо дар бахши истихроҷи газ, идомаи иштироки Русия дар сохтмони иншооти гидроэнегетикии Тоҷикистон ва лоиҳаҳои дигар интизорӣ дорем», – гуфт ӯ.
Ба ақидаи А.Мамадазимов, дар гуфтушуниди қарибулвуқӯъи сарони кишварҳои Русияву Тоҷикистон атрофи масоили нигаҳдории квотаҳо барои муҳоҷирони тоҷик ва андешидани чораҳо ҷиҳати пурзӯр кардани дифоъ аз ҳуқуқу озодиҳои онҳо табодули афкори ошкоро сурат хоҳад гирифт. «Баррасии масоили ҳамкории минбаъдаи низомиву техникӣ, ки миёни кишварҳо афзалиятнок арзёбӣ мегардад, низ аз эҳтимол дур нест», – афзуд коршноси масоили сиёсӣ.
