Соли 2025 барои мусоидат ба дохилшавӣ ба донишгоҳҳо 9 тан даст ба ришваситонӣ задаанд, ки ҷинояташон ошкор ва алайҳашон парвандаи ҷиноятӣ боз гардидааст.
Фирӯз Камолзода, муовини раиси Оҷонсии зиддифасод, рӯзи 13-уми феврал дар нишасти матбуотӣ гуфт, соли гузашта 14 ҳолати гирифтани пора ошкор шудааст, ки ҳамаи он ба мусоидат ҷиҳати дохилшавӣ ба муассисаҳои олии касбӣ марбут будааст.
Дар пайи ин, ба гуфтаи Камолзода, нисбати 9 нафар барои гирифтани пора парвандаи ҷиноятӣ боз шуда, барои баррасӣ ба додгоҳ ирсол шудааст.
Муовини раиси Оҷонсии зиддифасод барои мисол аз Донишгоҳи давлатии ҳуқуқ, бизнес ва сиёсати Тоҷикистон (дар Хуҷанд) ва Донишгоҳи давлатии Бохтар ба номи Носири Хусрав ном бурд.
Назари масъулини ин донишгоҳҳо ба мо дастрас нест.
Камолзода ҳам номи дигар донишгоҳу донишкадаҳо зикр накард, ҳувияти ба фасод дастзадаҳоро ошкор насохт ва ҳамчунин ҳаҷми пораро ҳам нагуфт. Танҳо аз ин раванд изҳори нигаронӣ кард.
Марказе, ки мақсадаш аз байн бурдани фасод аст
Беш аз 12 сол аст, ки дар Тоҷикистон Маркази миллии тестӣ (ММТ) фаъолият мекунад. Ин марказ довталабонро ба таври ройгон ба муассисаҳои миёнаи касбӣ ва олӣ дохил месозад ва яке аз ҳадафҳои асосии он пешгирӣ аз фасод дар раванди қабул эълон шудааст.
Масъулини ММТ иддао доранд, ки дар тӯли ин солҳо сатҳи фасодро ба маротиб коҳиш додаанд ва борҳо аз аҳолӣ хоҳиш кардаанд, ки ба қаллобон барои тағйири натиҷаҳо пул напардозанд.
Коршинос чӣ назар дорад?
Коршиносон ҳам эътироф мекунанд, ки ММТ дар тӯли як даҳсола тавонист теъдоди зиёди довталабонеро, ки бо низоми пешина донишҷӯ шуданашон душвор буд, бидуни “миёнарав” ба донишгоҳҳо дохил кунад, вале “таъсироти инсонӣ”-ро набояд сарфи назар кард.
Комилҷон Раҳимов, коршиноси масоили илму маориф пештар ба “Азия-Плюс” гуфта буд, ки низоми анъанавии мерос аз давраи шӯравӣ ҷанбаҳои ҳам мусбат ва ҳам манфӣ дошт.
Ба қавли ӯ, бо низоми анъанавӣ донишҷӯ шудан кори басо сангин буд, аз довталаб дониши хуб ва ҷаҳонбинии фарохро талаб мекард, довталаб рӯбарӯи муаллим менишаст ва ба устоди огоҳ аз ихтисос имтиҳон месупорид, аз ин рӯ, довталаб тасодуфан ба ин ё он ихтисос дохил шуда наметавонист.
“Аммо ин низом – ҳам дар замони шӯравӣ ва ҳам дар даврони истиқлол – ба фасод олуда гардид. Роҳҳои “миёнабур” сохта шуд ва бачаҳои донишманд, вале камбағал ва бепул донишҷӯ шуданашон душвор буд”, – мегуфт коршинос.
Дар ҳамин ҳол, Раҳимов таъкид мекунад, “агар ММТ-ро бо низоми пешина муқоиса кунем, албатта, пешравиҳо ҳастанд, пеш аз ҳама, ММТ мизони фасод ва хешутаборбозиро хеле коҳиш дод ва заминаи ба таври бесобиқа донишҷӯ шудани довталабони донишманд, аммо камбағалро гузошт”.
“То кунун дар ягон ҷои дунё системаи идеалӣ сохта нашудааст. Шумо метавонед ба натиҷаҳои санҷиши ММТ 100 дарсад бовар кунед, аммо ҳолатҳое ҳастанд, ки ба омили инсонӣ вобастигӣ доранд, масъалан, ҷойгиркунии довталабон дар донишгоҳҳо ва қабули донишҷӯ берун аз тестҳо, ки бояд онҳоро нодида нагирем”, – хулоса мекунад Раҳимов.
