Давоми рӯз ҳамлаи Эрон ба Исроил ва пойгоҳҳои Амрико дар кишварҳои Ховари Миёна идома ёфт ва дар посух ба он Исроил ҳам ба Эрон чанд мушак партоб кард. Дар зимн, ҳаводиси охир, сабаби лағви парвозҳои "Сомон Эйр" аз Душанбе ба Теҳрон шуд ва сокинони Тоҷикистон барои ҳамдардӣ ба Сафорати Эрон рафтанд. Охирин таҳаввулоти марбут ба минтақаро дар ин маводи мо хонед.
Ҳамдардии тоҷикистониҳо
Имрӯз, 3-юми март теъдоде аз шаҳрвандони Тоҷикистон ба Сафорати Эрон дар Душанбе рафта, кушта шудани Алии Хоманаӣ, раҳбари олии Эрон ва чанде аз масъулону шаҳрвандони ин кишварро таслият гуфтаанд.
Сафорат мегӯяд, онҳо бо эҳдои гул ҳамбастагии худро ба миллати Эрон изҳор доштанд.
Ба ғайр аз ин, Толиб Озарахш ва Фарзонаи Хуҷандӣ, ду Шоири халқии Тоҷикистон ба сафири Эрон дар Душанбе паёми ҳамдардии худро фиристодаанд.
Дар ин паём шоирон ба сафир ва мардуми Эрон таслият гуфта, изҳор доштаанд, “чӣ фархунда умре ки дар роҳи наҷоти Ватан фидо шавад ва чӣ поянда номе, ки бар пештоқи меҳан ва дар ҷаридаи қалбҳои мунаввар барои ҳамеша сабт гардад”.
“Пайваста ба даргоҳи Ҷаҳондори якто ниёиш мекунем, ки миллати хуҷастаи Эрон ва мардумони ин диёри бостон ва росткеш – ҳамдилон ва ҳамзабонони ҷовидони мо – аз шарри аҳриманони ҷаҳонхор дар амон монда, раҳоӣ ёбанд ва парчами пирӯзиро баланд афрозанд”, – омадааст дар паёми ду шоири шаҳири тоҷик.
Толиб Карими Озархаш ва Фарзона ҳарду аз чеҳраҳои шинохтаи адабиёти муосири тоҷик буда, дар ҳавзаи форсизабонон ҳам шӯҳратёр ҳастанд.
Лағви парвозҳои “Сомон-Эйр” ба Теҳрон
Ҳамзамон, дар пайи нооромиҳо дар Ховари Миёна ширкати ҳавопаймоии “Сомон Эйр” эълон кард, ки маҷбур аст, аз сабаби маҳдудиятҳои фазои ҳавоӣ дар ин минтақа парвозҳои худро дар масири Душанбе-Теҳрон то 31-уми март боздорад.
Ин ширкат рӯзи 3-юми март ба мусофироне, ки барои сафар дар ин муддат билет доранд, тавсия додааст, ки вазъи парвозро пешакӣ дар сомонаи расмии “Сомон Эйр” тафтиш кунанд ва барои гирифтани маълумоти нав бо маркази тамос бо рақамҳои зерин тамос гиранд:
Тел: +992 44 640 40 49, +992 44 640 40 50,
WhatsApp: +992 93 777 74 59.
Қаблан, ин ширкат парвозҳояшро то 6-уми март ба Дубай боздошта буд.
Омори нави куштшудаҳои Эрон
Дар ҳамин ҳол, Ҳилоли аҳмари Эрон хабар дод, ки теъдоди кушташудаҳо дар пайи ҳамлаҳои Амрикову Исроил ба ин кишвар ба 787 тан афзоиш ёфтааст. Қаблан теъдоди кушташудаҳо 555 нафар гуфта мешуд.
Теъдоди захмиён эълон нашудааст. Дар рӯзи аввали ҳамлаҳои Амрикову Исроил ба Эрон, Ҳилоли аҳмар теъдоди захмиёнро 747 тан гуфта буд.
Ин ҷамъият изҳор доштааст, ки Амрико ва Исроил то кунун ба 153 шаҳр ва 504 нуқтаи Эрон 1 ҳазору 39 зарба задаанд.
Оҷонсии байналмилалии энергияи атомӣ ҳамла ба иншооти ҳастаии Натанзро тасдиқ кард
Ҳамчунин, Оҷонсии байналмилалии энергияи Атомӣ (МАГАТЭ) тасдиқ кардааст, ки чанд бино дар иншооти ҳастаии "Натанз" дар натиҷаи ҳамлаҳои Амрикову Исроил ба Эрон осеб дидаанд.
Оҷонсӣ чанде пеш дар саҳифаи “Х”-и худ навишт, ки тибқи таҳлили аксҳои моҳвораӣ даромадгоҳи корхонаи зеризаминии ғанигардонии уран зарар дидааст. Вале гуфтааст, ки хатари паҳншавии радиатсия вуҷуд надорад.
Қаблан, намояндаи Эрон дар ин созмон аз ҳамла ба иншооти ҳастаии “Натанз” хабар дода буд. Он замон ин созмон гуфта буд, ки ҳамларо тасдиқ ё рад карда наметаовнад.
Кутоҳ аз ҳаводиси Эрон
Дар соатҳои гузашта, ҳамлаҳои Амрикову Исроил ба Эрон идома дошта, ба чанд нуқта, аз ҷумла дар хиёбонҳои Пардис ва Порчини Теҳрон, Бушеҳр ва Урумия зарба задааст.
Хабаргузории “Форс” аз кушта шудани 13 нафар дар пайи ҳамлаи рӯзи гузашта ба як пойгоҳи артиши Эрон дар шаҳри Кирмон хабар дод.
Дар ҳамла имрӯз, ба Исфаҳон низ се нафар кушта шудааст.
Амрико ва Исроил дар ҳамлаҳои худ ба Эрон 5 бемористони бузург ва 10 марказҳои дармонӣ ва беҳдоштӣ зарба задаанд.
Расонаҳои Эрон бо такя ба Вазорати мероси фарҳангии ин кишвар хабар доданд, дар пайи ҳамлаҳои Амрикову Исроил “Кохи Гулистон” осеби ҷиддӣ дидааст.
“Кохи Гулистон” аз ҷумлаи осори таърихии муҳим дар Теҳрон, пойтахти Эрон мебошад, ки ба феҳристи мероси ҷаҳонии ЮНЕСКО ворид шудааст.
Мудири ин кох гуфтааст, ки аз мавҷи таркишҳо шишаҳо шикаста, миқдори осеби расидааст.
Исроил теъдоди захмиёнро дар пайи ҳамлаҳои Эрон эълон кард
Ҳамчунин, ҳамлаҳои Эрон низ ба Исроил тайи чанд соати охир шиддат гирифт. Вазорати тандурусти Исроил эълон кардааст, ки дар пайи ҳамлаҳои Эрон ба Исроил 1 ҳазору 50 тан захмӣ шудааст. Гуфта мешавад, аз ин теъдод, танҳо 120 нафар дар беморхона бистарӣ буда, боқимонда рухсат шудаанд.
Ба навиштаи “The Time Of Israel” танҳо шабонарӯзи гузашта 289 маҷрӯҳ ба бемористонҳо интиқол ёфтааст.
Қаблан Исроил кушта шудани беш аз 10 нафарро дар ҳамлаҳои Эрон тасдиқ карда буд.
Ховари Миёна
Зимнан, ҳамлаҳои Эрон ба пойгоҳҳои Амрико дар Ховари Миёна низ идома дорад. Аз ҷумла, Имороти Муттаҳидаи Араб аз кушта шудани 3 нафар ва захмӣ гаштани 68 тан дар пайи ҳамлаҳои Эрон хабар дод, менависад “Ал-Ҷазира”
Вазорати дифоъи Иморот гуфтааст, ки Эрон ба ин кишвар 186 мушак ва 812 паҳпод задааст ва иддао кардааст, ки 172 мушак ва 755 паҳподро нобуд кардааст.
Ҳамчунин, Уммон гуфтааст, ки тайи чанд соати охир як паҳпод дар наздикии бандари Салала суқут кард ва як паҳподи дигар дар ин кишвар раҳгирӣ шудааст. Талафот ба қайд гирифта нашудааст.
Дафтари Комиссариати Олии СММ (UNHCR) мегӯяд, ки аз замони оғози ҳамлаи Исроил ба Лубнон беш аз 30 ҳазор нафар ба паноҳгоҳҳо рафтаанд.
Қувайт чанде пеш ҳамла ба сафорати Амрико дар шаҳри Кувайтро тасдиқ кардааст.
Қатар чанд соат пеш эълон кард, ки беш аз 8 ҳазор нафар бинобар баста будани фазои ҳавоӣ дар минтақа дармондаанд.
Нархи нафт гарон шудааст
Дар ҳамин ҳол, дар пасманзари ҳамлаи Амрикову Исроил ба Эрон нархи нафт ва газ дар бозорҳои ҷаҳонӣ гарон шудааст. Рӯзномаи бритониёии “Financial Times” хабар додааст, ки арзиши газ дар Аврупо 45% боло рафтааст.
Ҳамчунин, Эрон тангаи Ҳурмуз, гузаргоҳи борике миёни Хали Форс ва Уқёнуси Ҳиндро маҳдуд кард, ки тавассути 20% тамоми нафту гази дунё аз ин танга мегузарад.
Дар ҳамин ҳол, нархи нафт то 85 доллар барои як баррел боло рафтааст. Коршиносон пешгӯӣ мекунанд, ки он ба зудӣ метавонад ба 100 доллар бирасад.
Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон
