Душанбе. 13-уми феврал. ОИ «Азия-Плюс» – Имрӯз дар ярмаркаи ҷойҳои кории холӣ, ки дар бинои Сирки давлатии шаҳри Душанбе баргузор мешавад, ба хоҳишмандон беш аз 5 ҳазор ҷойи корӣ пешниҳод мегардад.
Тавре ба ОИ «Азия-Плюс» аз Агентии давлатии ҳифзи иҷтимоӣ, шуғли аҳолӣ ва муҳоҷирати шаҳри Душанбе хабар доданд, дар ярмарка 104 корхонаву муассисаҳо, аз ҷумла корхонаи ҷуроббофӣ, ҶДММ «Стройинвест-2000», ки барои сохтмони нерӯгоҳҳои Сангтӯда бинокоронро даъват месозад, хоҷагии манзилию коммуналӣ ва раёсати тандурустии пойтахт, шӯъбаи маорифи ноҳияи Шоҳмансур ва ғайра ба хоҳишмандон ҷойи кор пешкаш месозанд.
Бино ба иттилои манбаъ, музди меҳнат ба ҷойҳои кории пешниҳодшуда аз 120 то 900 сомониро ташкил медиҳад.
Интизор меравад, ки дар ярмарка ҳамчунин ташкилотҳое, ки бо сафарбар сохтани шаҳрвандон ба муҳоҷирати меҳнатӣ сарукор доранд, аз ҷумла «Тоҷикхориҷакор», Биржаи меҳнати Кумитаи ҷавонон, варзиш ва сайёҳии назди ҳукумати ҷумҳурӣ ва ғайра низ ширкат варзанд.
