Душанбе. 12-уми феврал. ОИ «Азия-Плюс» – Коршиносони вазорати кишоварзии ҷумҳурӣ ҳаҷми нави қарзҳоеро, ки аз ҷониби ҳукумат барои истеҳсоли пахта дар як гектар ҷудо мегардад, таҳия намуда, барои тасдиқ ба ҳукумати кишвар пешниҳод карданд.
Тавре ба ОИ «Азия-Плюс» сардори раёсати сиёсати иқтисодӣ ва ояндабинии вазорат Сафар Маҳмадиев хабар дод, агар соли гузашта барои истеҳсоли пахта дар як гектар хоҷагиҳо метавонистанд 800 $ қарз гиранд, пас имсол бо назардошти болоравии нархҳо андозаи он 1100 доллари ИМА-ро ташкил хоҳад дод.
Дар мавриди пардохтани қарзҳои ҳукумат, ки ба хоҷагиҳо соли гузашта ҷудо гардида буд, номбурда изҳор дошт, ки дар вилояти Суғд ин нишондиҳанда ба 40,2 ва Хатлон 26 дарсадро ташкил медиҳад. «Ноҳияҳои тобеи марказ танҳо аз воситаҳои худи бонкҳо қарз гирифта буданд», – афзуд ӯ.
