Пулиси пойтахт дар се моҳи соли равон 43 ҳолати монеъ шудан ба таҳсили хонандагонро ошкор карда, алайҳи 43 падару модар парвандаи ҷиноӣ оғоз ва барои баррасӣ ба додгоҳ ирсол кардааст.
Аз Раёсати корҳои дохилӣ (РВКД) дар шаҳри Душанбе ба “Азия-Плюс” гуфтанд, ки алайҳи ин афрод бо гумони монеъ шудан ба гирифтани таҳсилоти миёнаи умумӣ (моддаи 164 КҶ) парвандаи ҷиноӣ оғоз шуда, барои баррасӣ ба додгоҳ ирсол шудааст.
Ин ниҳод дар бораи шахсияти онҳо маълумот надодааст. Ҳамчунин, назари онҳо дар робита ба иттиҳоми мақомот маълум нест.
Бар асоси ин иттиҳом, ба волидайн, аз 78 ҳазор то 93 ҳазору 600 сомонӣ ҷарима (аз 1000 то 1200 нишондиҳанда барои ҳисобҳо), аз 180 то 240 соат корҳои ҳатмӣ ё то ду соли зиндон ҷазо таҳдид мекунад.
Пулиси Душанбе ба афзоиши ҳолатҳои монеъ шудан ба таҳсили хонандагон таъкид карда, аз падару модарон хостааст, то нисбати таълиму тарбия ва таҳсили фарзандонашон ҷиддӣ муносибат кунанд.
“Барои ба ҳар шакле монеъ шудан ба гирифтани таҳсилоти миёнаи умумӣ қонунгузорӣ ҷавобгарии ҷиноятиро пешбинӣ кардааст”,-навиштааст манбаъ.
Тибқи иттилои Додситонии кулли Тоҷикистон дар соли 2025 ин ниҳод барои аз таҳсил дур кардани фарзандон нисбати волидайни онҳо 331 парвандаи ҷиноятӣ боз кардааст.
Чанде қабл Додгоҳи шаҳри Исфара алайҳи ду сокини ин шаҳр барои аз таҳсил дур кардани фарзандашон ҷазо дар намуди беш аз 200 соат корҳои ҳатмӣ, таъин кард. Ин ниҳод гуфт, ки ҳарду волидайн кӯдаконашонро ба Русия бурдаанд, ки дар натиҷа, онҳо чанд сол аз таҳсил дур мондаанд.
Бояд гуфт, соли 2024 дар пайи тағйиру илова ба Кодекси ҷиноятӣ барои монеъ шудан ба таҳсили хонандагон дар мактабҳои миёна, ҷазои ҷиноӣ пешбинӣ шуд. Барои ин кирдор то 93 ҳазору 600 сомонӣ ҷарима ё ду соли зиндон ҷазо пешбинӣ шудааст.
