Хайрулло Саидов, писари соҳибкор ва сиёсатмадори зиндонӣ Зайд Саидов, бо нашри муроҷиатнома дар саҳифаи Фейсбуки худ гуфт, мақомоти масъули иҷрои қарори додгоҳ, тасмим доранд охирин манзили истиқоматии онҳоро дар маркази пойтахт мусодира кунанд ва нигаронӣ кард, ки дар ин ҳолат, фарзандони онҳо бидуни сарпаноҳ мемонанд. Қарори мусодираи хона аз сӯйи додгоҳ чанд сол пеш содир шудааст.
Хайрулло Саидов навишт, дар хонае, ки тасмими мусодирааш гирифта шудааст, дар умум, 23 нафар, аз ҷумла 17 кӯдаки хурдсол зиндагӣ мекунанд ва дар сурати иҷрои қарори додгоҳ ҳамаи онҳо бесарпаноҳ хоҳанд монд.
“Инак, охирин сарпаноҳи фарзандони Зайд Саидро гирифтанианд ва фарзандону наберагони ӯро дар кӯча гузоштанианд. Хуб, ҳукми маъруф ба “Тақозои замон” падарамро ба муҳлати тӯлонӣ зиндонӣ кард ва тамоми молу дороии ӯ ва фарзандону наздиконашро ба ҳабс гирифт. Оё ягон қонун иҷозат медиҳад, ки амволу дороии гуноҳкор бе исбот ва далели ин ки ғайриқонунӣ ба даст омадааст, мусодира карда шавад? Гузашта аз ин, чаро бояд амвол ва дороии зану фарзандони ӯ мусодира шавад? Ҳабс кардан – маънои бе исботу далел мусодира кардани амволро дорад?”, – навишт Хайрулло Саидов.
Писари соҳибкори зиндонӣ ишора кард, ки замони сохтмони ин хонаҳо дар маҷмааи “Пойтахт-80”, фарзандони Зайд Саидов аллакай дар синни балоғат буданд, фаъолияти соҳибкорӣ доштанд ва бо даромади шахсии худ дар бунёди ин биноҳо саҳм гузоштанд.
Хайрулло Саидов аз мақомоти дахлдори кишвар хоҳиш кардааст, ки “ба кӯдакони хурдсоламон раҳм кунед, нагузоред, ки оби чашми ин тифлакон бирезад ва дар ин рӯзҳои сахти ҳаётамон сарсону ҳайрон дар кӯча монанд”.
Акс аз Радиои Озодӣ
“Мо дар мулки бегона не, дар Ватани худ дучори чунин муносибат шудаем. Мо бояд ба куҷо равем, дар куҷо зиндагӣ кунем? Агар падарамон “гунаҳкор” аст, бояд мо фарзандону набераҳо ҳам муҷозот шавем?”, – омадааст дар матни муроҷиатнома.
Аз Додгоҳи олии Тоҷикистон ба Радиои Озодӣ гуфтаанд, ки ҳукм нисбат ба Зайд Саидов ва мусодираи амволи ӯ “барвақт қувваи қонунӣ гирифтааст, вале мусодираи амвол дар доираи он бар дӯши ниҳодҳои дигари дахлдор асту ҳанӯз идома дорад”.
Бояд гуфт, иҷрои дастури додгоҳ ба зиммаи Хадамоти иҷро аст ва амволи ба фоидаи давлат мусодирашуда ба идораи Кумитаи давлатии сармоягузорӣ ва идораи амволи давлатӣ вогузор мешавад.
Зайд Саидов вазири саноати Тоҷикистон ва пас аз барканорӣ аз ин мақом, ба тиҷорат машғул буд. Соли 2013 баъди талоши таъсиси ҳизби “Тоҷикистони нав” боздошт ва баъдан бо иттиҳоми “суистифода аз мақом, бисёрзанӣ, ришвахорӣ, сохтакории санад, тасарруфи пули давлат ва саркашӣ аз пардохти молиёт (андоз)” ба 26 соли зиндон маҳкум шуд. Баъдан ба ҳукми ӯ 3 соли дигар илова шуд. Худи ӯ ва созмонҳои ҳуқуқи башар ин парвандаро дорои ангезаҳои сиёсӣ меҳисобанд.
