Тоҷикистон ва Ӯзбекистон метавонанд ҳамкориҳоро дар соҳаи нафту газ густриш диҳанд. Ҷонибҳо бори дигар сари баррасии масъалаи интиқоли маҳсулоти “Ӯзбекнефтегаз” ба Тоҷикистон баргаштанд. Қаблан ин навъи маҳсулот интиқол меёфт, вале дар як давраи муайян боздошта шуд.
Тавре ки хадамоти матбуоти ҶС “Ӯзбекнефтегаз” хабар медиҳад, раиси раёсати ширкати мазкур Абдуғанӣ Сангинов бо намояндагони ҳайати расмии Тоҷикистон дидору гуфтушунид кардааст.
Дар гуфтушунидҳо директори Агентии захираҳои модии назди ҳукумати ҷумҳурӣ Нурмуҳаммад Аҳмадзода ва сафири Тоҷикистон дар Ӯзбекистон Насриддин Исматулло ширкат варзидаанд.
Гуфта мешавад, зимни вохӯрии ҷонибҳо дурнамои таҳвили маҳсулоти нафту гази ширкати Ӯзбекистон ба бозори Тоҷикистон баррасӣ шуд. Ҷониби Тоҷикистон ба хариди маҳсулот аз корхонаҳои бузурги саноатии ширкати “Ӯзбекнефтегаз” таваҷҷуҳ зоҳир намуд.
Дар ширкат таъкид доштаанд, ки интиқоли эҳтимолии маҳсулот метавонад бо шартҳои бозаргонӣ сурат гирад. Ҳамчунин зикр шудааст, ки тайи солҳои ахир ҳамкорӣ байни кишварҳо ба сатҳи стратегӣ расида, бар асоси эътимоди тарафайн ва ҳамҷавории нек рушд меёбад.
Дар ҳамин ҳол, аз ҳаҷмҳои мушаххаси таҳвил ва муҳлатҳои интиқоли эҳтимолӣ ҳоло саҳеҳ маълумот дода нашудааст.
Ӯзбекистон пештар яке аз таҳвилгарони калидии газ ба Тоҷикистон маҳсуб меёфт. Аммо соли 2012 интиқол қатъ шуда буд. Он замон “Азия-Плюс” хабар дода буд, ки Ӯзбекистон аз қатъи пурраи содироти газ аз 1 апрели соли 2012 хабар дода, сабаби инро норасии захираҳо маънидод карда буд.
Мувофиқи созишномае, ки аввали соли 2012 ба имзо расид, Тоҷикистон харидани ҳудуди 200 млн метри мукааб газро ба нақша гирифта, дар ҳамин ҳол, ҳаҷми кафолатнок дар семоҳаи якум 45 млн метри мукааб муқаррар шуда буд.
Бино ба маълумоти “Тоҷиктрансгаз”, то охири моҳи марти ҳамон сол ҳудуди 41 млн метри мукааб газ интиқол дода шуда, таҳвил бояд то квотаи семоҳа расонида мешуд.
Пас аз қатъи содирот ҳамкории энергетикӣ байни кишварҳо ба таври назаррас коҳиш ёфт. Танҳо солҳои охир дар пасманзари беҳбуди муносибатҳо, ҷонибҳо тадриҷан ба барқарор намудани робитаҳои иқтисодӣ оғоз бахшиданд.
Қобили зикр аст, ки дидору гуфтушунидҳои кунунӣ метавонанд як иқдоми навбатӣ дар ин самт шаванд.
