Имрӯз, 30 апрел ва пагоҳ, 1 май ба далели боришот дар минтақаҳои доманакӯҳиву кӯҳии ноҳияҳои тобеи ҷумҳурӣ ва бархе ноҳияҳои вилояти Хатлон омадани сел аз эҳтимол дур нест.
Бино ба маълумоти Агентии обуҳавошиносӣ, рӯзҳои 1 ва 2-юми май дар шаҳру ноҳияҳои ҷанубӣ ва марказии вилояти Хатлон, ноҳияҳои тобеи ҷумҳурӣ ва шаҳри Душанбе, инчунин, рӯзҳои 2 ва 3-юми май дар минтақаҳои шарқии Вилояти Мухтори Кӯҳистони Бадахшон хокбориш рух дода, аз гарду ғубор ҳаво олуда мешавад. Оҷонсӣ гуфтааст, ки хокбориш аз минтақаҳои ҷанубу ғарбӣ ва шимолу ғарбӣ ба кишвар ворид хоҳад шуд.
Баландшавии сатҳи ифлосшавии ҳавои атмосфера аз заррачаҳои ғубори РМ-10 ва РМ-2,5 пешгӯӣ шудааст.
Қобили зикр аст, ки моҳи май дар Тоҷикистон обуҳавои тағйирёбанда дар назар аст. Дар водиҳо ҳарорат шабона 15-22 ва рӯзона 27-38 дараҷа гарм мешавад. Дар баъзе ноҳияҳои ҷануб рӯзҳои ҷудогона ҳарорат метавонад то ба 40-42 дараҷа гармӣ расад. Дар доманакӯҳҳо ҳарорат шабона 11-19 ва рӯзона 20-33 дараҷа гарм мешавад.
Миқдори боришот дар баъзе ноҳияҳо аз меъёр поинтар пешбинӣ мешавад: дар водиҳои ноҳияҳои тобеи марказ (меъёр 54-73 мм), вилояти Хатлон (14-58 мм) ва ноҳияҳои доманакӯҳ (98-135 мм).
Ҳамчунин зикр мебояд кард, ки давоми моҳ ҳавои абрноки тағйирёбанда, баъзан боридани борон бо раъду барқу жола ва тӯфони чангу ғубор пешгӯӣ шудааст. Пурқувват шудани суръати вазидани шамол аз самти ғарб то 17-22 м/с аз эҳтимол дур нест.
