Додгоҳи шаҳри Исфара як зани 36-соларо барои ба худкушӣ расонидани ҳамсари бародараш 4 сол равонаи зиндон кардааст. Ин ниҳод аз маҳкумшуда З.Б ном бурда, гуфтааст, ки ӯ сокини ҷамоати Ворух аст ва бо Ш.И, ҳамсари бародараш якҷо зиндагӣ мекард.
Ба гуфтаи манбаъ, маҳкумшуда соли 2025 нисбати келини хонавода “муносибати дағалона нишон дода, ӯро мунтазам таҳқир мекард ва шаъну эътиборашро дар назди дигар аъзои оила паст мезад”.
Додгоҳ гуфтааст, ки Ш.И аз “фишори равонӣ ва муносибати бераҳмона рӯҳафтода шуда”, рӯзи 18-уми ноябри соли гузашта дар манзили зисташ худро ба дор овехтааст.
Мақомот зимни тафтиши телефони марҳум муайян кардаанд, ки ӯ ба шавҳараш аз муносибати бади хоҳараш нисбати ӯ шикоят кардааст.
Маҳкумшуда дар додгоҳ ин иттиҳомро рад карда, худашро бегуноҳ донистааст. Вале дар қарори додгоҳ гуфта мешавад, ки додрас бо такя ба “далелҳои ҷамъовардашуда, нишондоди шоҳидон ва хулосаи баррасии тиббӣ”, ин занро бар асоси моддаи 109 қисми 1-и Кодекси ҷиноӣ (ба худкушӣ расонидан) гунаҳгор дониста, ӯро ба 4-сол зиндон дар маҳбаси низомаш умумӣ маҳкум кардааст.
Ин ҳукм кай содир шудааст, маълум нест. Вале он рӯзи 4-уми май дар сомонаи додгоҳи Исфара нашр шудааст.
Назари пайвандони марҳум дар робита ба ин қазия дастрас нест.
Пештар аз он бошад, як мард дар ҳамин ноҳия бо иттиҳоми ба худкушӣ расонидани ҳамсараш боздошт шуда буд. Гуфта мешуд, ки ӯ мунтазам шаъну шарафи ҳамсарашро паст зада, ӯро “ба фоҳишагӣ ва ҳамхобагӣ бо мардони бегона” айбдор мекард.
Дар Тоҷикистон омори алоҳидаи куштор ё сӯиқасд ба куштори ҳамсарон аз дасти шавҳаронашон нест. Вале Бунафша Файзиддинзода, раиси Кумитаи занон ва оилаи Тоҷикистон дар нишасти матбуотии моҳи феврал соли гузашта гуфта буд, ки соли гузашта 3 ҳазору 246 ҷиноят нисбати занону духтарон содир шудааст.
Тибқи иттилои ВКД дар кишвар дар шаш моҳи соли 2025 – 28 ҳолати одамкушӣ ва сӯйиқасд ба ҷон сабт шудааст. Маълум нест, ки дар ин миён чандто куштори ҳамсарон аст.
