Ду дастаи баскетболбози шахсони маъюбиятдоштаи “Ғайрат” ва “Ваҳдат”-и Тоҷикистон дар ҷамъомади баскетболи аробанишин, ки дар шаҳри Анталия баргузор гардид, иштирок карданд. Варзишгарон дар ҷараёни ҷамъомад омӯзишҳои пешрафтаи техникӣ ва тактикӣ гирифта, ҳамзамон бо дастаҳои баскетболи аробанишини Туркия тамринҳои муштарак ва бозиҳои дӯстона анҷом доданд.
Ин барнома барои варзишгарон на танҳо аз ҷиҳати варзишӣ, балки дар самти таҷрибаи байналмилалии даставӣ ва шиносоӣ бо услубҳои гуногуни бозӣ низ имконият фароҳам овард. Ҳамчунин, иштирокчиён мусобиқаҳои баскетболи аробанишинро, ки дар Туркия баргузор мегардид, тамошо карданд.
Ҳадаф аз баргузории ҷамъомади таълимиву тамринӣ дар Анталия, баланд бардоштани иқтидори техникии варзишгарон, касби таҷрибаи байналмилалӣ ва шиносоӣ бо муҳити варзишии кишварҳои хориҷӣ мебошад. Ин барнома дар оянда ба таҳкими сохтори баскетболи аробачасавор дар Тоҷикистон ва фароҳам овардани замина барои таъсиси дастаи мунтахаби миллӣ мусоидат хоҳад кард.
