Хоруғ. 11-уми июл. ОИ «Азия-Плюс» – Соли оянда дар ноҳияи Ишкошими ВМКБ ярмарка-фурӯши таҷҳизот ва фанновариҳои Чин барои истеҳсолоти хурду миёна доир мегардад. Дар ин хусус зимни сафари соҳибкорони вилоят ва ҳайати расмии ВМКБ ба Чин барои иштирок дар Ярмаркаи
V
-уми байнулмилалии кишварҳои Осиёи Марказӣ ва Ҷанубӣ тавофуқ ҳосил шуд.
Чӣ тавре ки ба ОИ «Азия-Плюс» роҳбари ҳайати расмӣ, муовини роҳбари дастгоҳи раиси ВМКБ Таваккал Рамазонов иттилоъ дод, ярмарка дар вилояти Қошғари Чин аз 28-уми июн то 2-юми июл баргузор шуда, дар он дар баробари тоҷирони 40 кишвари дунё ва ҳамаи вилоятҳои Чин беш аз 30 соҳибкори вилоят низ ширкат варзидаанд. «Ҳайати мо бо намояндагони сохторҳои давлативу тиҷоратии Чин дидору гуфтушунид намуда, таворфуқ ҳосил гардид, ки соли оянда дар ноҳияи Ишкошим ярмарка-фурӯши таҷҳизоти истеҳсоли масолеҳи сохтмон аз ашёи маҳаллӣ, маҳсулоти чорводорӣ ва коркарди сабзавоту мева баргузор гардад», – гуфт ӯ.
Номбурда ҳамчунин гуфт, зимни дидору гуфтушунидҳо масоили соддакунии тарзи тартиби убури марз, ташкил кардани алоқаи ҳавоии «Қошғар-Душанбе-Қошғар», тезонидани ҳалли масъалаи ифтитоҳи бозорҳои савдои наздисарҳадӣ низ баррасӣ шудаанд.
