Душанбе. 28-уми январ. ОИ «Азия-Плюс» – Овозаҳо дар мавриди
боло рафтани маблағи пардохти боҷи гумрукӣ барои воридоти мошинҳои хориҷӣ ба Тоҷикистон асоси воқеӣ надоранд.
Тавре аз маркази матбуоти Хадамоти гумруки назди ҳукумати ҷумҳурӣ ба ОИ «Азия-Плюс» хабар доданд, тағйир додани маблағи пардохти боҷи гумрукӣ барои воридоти мошинҳои хориҷӣ ба кишвар ба нақша гирифта нашудааст ва овозаҳои бесасос танҳо миёни аҳолӣ бесарусомониву ташвишро ба вуҷуд меоварад. «Дар сурати тағйири тарофаҳо мо аҳолиро пешакӣ огоҳ хоҳем кард», – гуфт манбаъ.
Ба иттилои манбаъ, тибқи қонунгузории амалкунанда, барои шахсони воқеие, ки барои истифодаи шахсӣ ба кишвар мошин ворид месозанд, нархҳои зерин ҷорӣ шудаанд: шахсони воқеӣ барои ҳар як сантиметри мукааби ҳаҷми муҳаррики то 2,5 ҳазор сантиметри мукааб 0,27 $ маблағи боҷи гумрукӣ пардохт менамоянд, вале агар ҳаҷми муҳаррик аз 3 ҳазор сантиметри мукааб бештар бошад, маблағи пардохти боҷи гумрукӣ барои ҳар як сантиметри мукааб ба 0,40 $ баробар хоҳад буд.
