Душанбе. 1-уми июл. ОИ «Азия-Плюс» – Тибқи қарори раиси шаҳри Душанбе Маҳмадсаид Убайдуллоев, шурӯъ аз имрӯз дар шҳри Душанбе нуқтаҳои фурӯши маҳсулоти ғизоӣ ва маводи сӯзишворӣ бо нархи нисбатан арзон ба кор шурӯъ мекунанд.
Чӣ тавре ки сухангӯи раиси шаҳри Душанбе Шавкат Саидов ба ОИ «Азия-Плюс» иттилоъ дод, қарори мазкур бо мақсади коҳиши арзиши маҳсулоти асосии ғизоӣ ва маводи сӯзишворӣ ва инчунин назардошти муроҷиати Агентӣ оид ба захираҳои моддии назди ҳукумати ҶТ ба тасвиб расидааст. «Нуқтаҳои фурӯши орд, шакар, равғани рустанӣ ва дигар маҳсулоти ғизоӣ ва ҳамчунин бензин ва сӯзишвории дизелӣ дар тамоми ноҳияҳои пойтахт то 30-юми декабри соли ҷорӣ фаъолият мекунанд», – гуфт ӯ.
Ба гуфтаи Ш.Саидов, раиси шаҳри Душанбе унвонии иҷлосияи маҷлиси вакилони халқи пойтахт пешниҳоде ирсол кардааст, ки дар он озод кардани ин нуқтаҳои фурӯш аз пардохти андоз аз фурӯши чакана ва иҷораи бино пешбинӣ мегардад.
