Душанбе. 27-уми январ. ОИ «Азия-Плюс» – Имрӯз муовини вазири молияи ҷумҳурӣ Ҷамолиддин Нуралиев зимни вохӯрӣ бо рӯзноманигорон изҳор дошт, ки соли ҷорӣ ҳукумати ҷумҳурӣ ҷиҳати рушди бахши кишоварзӣ 180 млн. сомонӣ (беш аз 51 млн. $) маблағ ҷудо карданист.
Номбурда гуфт, соли равон ба механизми тақсими ин маблағҳо нисбат ба соли гузашта каме тағйирот ворид гаштааст, вале аз шарҳи ҷузъиёти он худдорӣ намуд.
Дар мавриди шарҳи масъалаи пардохти қарзи бонкҳо аз ҷониби хоҷагиҳои пахтакорӣ, ки аз воситаҳои ҳукуматӣ ҷудо гардида буданд, муовини вазири молия зикр кард, ки то имрӯз ба бонкҳо дар ҳаҷми 32 млн. сомонӣ маблағи ин қарзҳо баргардонида шудаанд.
