Душанбе. 8-уми май. ОИ «Азия-Плюс» – Дар қисмати шарқии шаҳри Маскав кормандони милиса барои бо корд ба шаҳрвандони Ветнам ҳамла намудан шаҳрвандони тоҷикро боздошт намуданд. Ду нафар ветнамиҳо аз зарбаи корд ҷароҳат бардошта, ба беморхона мунтақил шуданд.
Тибқи иттилои хабаргузории ИТАР-ТАСС, задухӯрд тахминан соатҳои 16-у 30 дақиқа дар бозори Черкизово ба вуқӯъ пайваста, дар он шаҳрвандони Тоҷикистону Ветнам иштирок доштаанд.
Кормандони милиса ба ҷойи ҳодиса ҳозир шуда, ду нафар гумонбаршуда – шаҳрвандони Тоҷикистонро боздошт карда, онҳоро ба РКД «Измайлово» мебаранд. Айни замон бо онҳо муфаттишон кор мекунанд.
Мувофиқи маълумоти пешакӣ, задухӯрд бар асари нофаҳмиҳо дар масъалаи ҷойи фурӯш дар бозор ба амал омадааст.
