Душанбе. 6-уми январ. ОИ «Азия-Плюс» – Раиси Кумита оид ба энергетика, саноат, сохтмон ва коммуникатсияи Маҷлиси намояндагони Маҷлиси Олии Ҷумҳурии Тоҷикистон Мирзошариф Исломиддинов дар сӯҳбати ихтисосӣ бо ОИ «Азия-Плюс» изҳор дошт, ки дар масъалаи баланд накардани арзиши барқ барои Ширкати алюминии Тоҷикистон (ТАЛКО) ҳукумати ҷумҳурӣ дуруст рафтор кард, зеро дастгирӣ накардани ширкате, ки 70 дарсади фоидаи асъори ҷумҳуриро таъмин месозад, аз рӯи мантиқ намебуд.
Ба ақидаи ӯ, дар шароити бӯҳрони молӣ, ки арзиши алюминий дар бозори ҷаҳонӣ бамаротиб коҳиш ёфт, ширкати мазкур табиист, ки бо мушкилоти молиявӣ дучор гашта, ҳаҷми истеҳсолотро коҳиш хоҳад дод. «Ғайр аз ин, ширкати номбурда дар як сол то 7,5 млрд кВт/соат нерӯи барқ истифода мекунад, ки 6,4 млрд. кВт/соати он нерӯи барқи истеҳсоли ватанӣ буда, боқимонда 1,2 млрд. кВт/соат истеҳсоли хориҷӣ аст ва ширкат ба «Барқи тоҷик» танҳо барои нерӯи барқи истеҳсоли ватанӣ маблағ пардохт мекунад», – гуфт ӯ.
Номбурда таъкид сохт, ки он ҷиҳатро ҳам ба назар гирифтан зарур аст, ки пардохти истифодаи нерӯи барқи истеҳсоли хориҷӣ тибқи шартномаҳои мустақилона бастаи ширкати «ТАЛКО» бидуни иштироки ширкати «Барқи тоҷик» сурат мегирад.
