Душанбе. 9-уми август. «Азия-Плюс» — | Соати сеи субҳи имрӯз бар асари сар задани сӯхтор дар бинои истиқоматии воқеъ дар кӯчаи Неъмат Қарабоеви шаҳри Душанбе Любов Яковлевнаи 57-сола ба ҳалокат расид.
Тавре ба ОИ «Азия-Плюс» аз Сарраёсати хадамоти оташнишонии ВКД хабар доданд, сӯхтор бар асари он сар задаст, ки зани ҳалокшуда сигарети дар дасташ бударо хомӯш накардааст.
«Сӯхтор майдони 20 метри мураббаъи манзили зистро фаро гирифта, хисороти расида аз он 50 ҳазор сомонӣ арзёбӣ мешавад», – гуфтанд дар сарраёсати мазкур.
Ба иттилои манбаъ, соҳиби хона – модари ҳалокшуда Анна Сказкина ва ду нафар меҳмононро оташнишинон саривақт наҷот додаанд ва онҳо ҳеҷ ҷароҳати ҷиддие набардоштаанд.
Дар ҳамин ҳол, аз Сарраёсати мазкур дар робита ба масъалаи сабабҳои рӯзи 8-уми август дар бозори «Корвон»-и пойтахт сар задани сӯхтор хабар доданд, ки комиссияи махсус муддати 10 рӯз сабабҳои сар задани сӯхтор ва ҳаҷми зарари расидаро муайян хоҳад кард.
