Президенти Тоҷикистон Эмомалӣ Раҳмон мардуми кишварро бо фарорасии иди саиди Фитр табрик гуфт.
Дар паёми табрикотии сарвари давлат гуфта мешавад, маҳз ба шарофати истиқлолият расму оин ва анъанаҳои неку писандидаи тўли ҳазорсолаҳо ташаккулёфтаи аҷдодамон имрўз ба як ҷузъи ҷудонопазири фарҳанги миллии мо табдил ёфтаанд. қонунияти бунёди давлати миллии муосир тақозо дорад, ки ҳам арзишҳои исломӣ ва ҳам расму оини аҷдодӣ бояд дар хизмати мардуми Тоҷикистон ва сарбаландии онҳо қарор дошта бошанд.
«Бо ҳамин мақсад тайи солҳои охир дар мамлакати мо ба хотири танзими масоили иҷтимоиву фарҳангӣ ва ахлоқӣ, аз ҷумла дар мавриди дин ва расму оинҳо як қатор тадбирҳои муҳим андешида шуда, қонуну санадҳои ҳаётан муҳим ба тасвиб расидаанд. қонуни ҷумҳурии Тоҷикистон «Дар бораи масъулияти падару модар дар таълиму тарбияи фарзанд» аз ҷумлаи онҳост. Қонуни мазкур мутобиқи талаботи ҷомеаи озод баъд аз муҳокимаи умумихалқии тўлонӣ ба тасвиб расида, дар таҳияи он ниҳодҳои гуногун, аз ҷумла аҳли уламо бо пешниҳодҳои мушаххас саҳм гирифтанд», – омадааст дар паёми табрикотӣ.
Дар паём ҳамчнин зикр мегардад, ки бузургтарин фазилати моҳи шарифи Рамазон дар он нозил гаштани китоби муқаддаси қуръон ҳамчун фарқ байни ҳаққу ботил, ҳалолу ҳаром ва илму ҷаҳолат аст. Дар нахустин оятҳои ба Паёмбари акрам нозилшуда Худованд амр ба хондану навиштанро ҳамчун василаи касби илм фармудааст.
«Аз ҷумлаи анъанаҳои неке, ки барои истиқболи иди саиди Фитр аз Паёмбари гиромиқадр ба умматонаш мерос мондааст, дар ин рўз манзилу маҳалли зисти худро тозаву озода кардан, либоси тозаву озодаи худро пўшида, бо шодиву нишот ба идгоҳ рафтан ва ҳамдигарро ба оѓўш гирифта, табрик кардан аст. Анъана ва суннати неки дигаре, ки дар рўзҳои ид анҷом дода мешавад, ба ниёзмандон хайру саховат кардан мебошад», – зикр мегардад дар паём.
«Бо чунин ниятҳои нек, моҳи шарифи Рамазонро хайрбод гуфта, ҳамаи шумо – хурду бузурги Ватани азизамонро дар арафаи бузургтарин ҷашни миллиамон – бистумин солгарди истиқлолияти давлатӣ бори дигар бо фарорасии иди саиди Фитр аз самими қалб муборакбод менамоям. Худованд тоату ибодат ва дуову дуруди шуморо дар ин моҳи муборак мақбули даргоҳи худ гардонад!
Ба ҳамаи шумо, бахту иқболи баланд, ҳамдиливу ҳамдигарфаҳмӣ, хушбахтиву некрўзӣ, дили шоду хонаи обод ва муҳимтар аз ҳама, неъмати бузурги суботу оромӣ ва осоишро орзумандам», – омадааст дар паёми сарвари давлат.
