Суди олии Тоҷикистон собиқ раиси филиали «Ориёнбонк» дар ноҳияи Мӯъминобод Сафармад Рустамовро ба 8,5 соли зиндони низомаш шадид бо мусодираи амвол маҳкум кард.
Тавре ба ОИ «Азия-Плюс» аз Суди олии ҶТ хабар доданд, Рустамов дар содир намудани ҷиноятҳо мутобиқи моддаҳои 32, қ. 3 (Тайёрӣ ба ҷиноят, сўисқасди ҷиноят), моддаи 104, қ. 2, б. «а, е, ж, з, и, к» (Одамкушӣ) ва 195, қ. 3 (Ғайриқонунӣ нигоҳ доштани аслиҳаи оташфишон)-и Кодекси ҷиноии ҶТ гунаҳкор дониста шуд. «Бо истифодаи қонуни афв мӯҳлати ҷазои Сафармад Рустамов аз чор як ҳисса кам карда шуд», – таъкид кард манбаъ.
Дар курсии айбдорӣ ҳамчунин ду нафар ҷонибдорони ӯ – Неъматулло Бойматов ва Нурулло Давлатов низ назди қонун ҷавоб доданд. Онҳо ба суиқасд ба куштор гунаҳкор дониста шуда, мутаносибан ба мӯҳлатҳои 8 солу 4 моҳ ва 8,5 сол аз озодӣ маҳрум карда шуданд. Бо истифодаи қонуни афв мӯҳлати ҷазои онҳо низ қисман кам карда шуд.
«Дар ҷараёни тафтишот маълум карда шуд, ки моҳи апрели соли 2000-ум хизматчиёни ҳарбии нерӯҳои марзбонӣ, ки миёнашон хешовандони қумондони он замон маъруфи Фронти халқӣ Қурбон Чолов низ ҳузур доштанд, қаҳвахонаи мутааллиқ ба оилаи Рустамовҳоро оташ заданд. Бо мақсади ниқор Сафармад Рустамов пешакӣ бо ҷонибдорони худ гапзанон карда, нақшаи куштори Чоловро тарҳрезӣ намуд», – гуфтанд дар Суди олӣ.
Ҳамин тариқ, моҳи майи соли 2000-ум гурӯҳи Рустамов бо автоматҳои Калашников, пулемёт ва норинҷакафканҳо мусаллаҳ гардида, ба қатори автомашинаҳои қумондон ҳамла карданд. Он замон аз ҳашт нафари ҳамроҳи қумондон Чолов ду нафар ҷароҳат бардошта буданд.
Ҳамчунин гуфта мешавад, қисмате аз гурӯҳи Рустамов соли 2001 аз ҷониби Суди олӣ ба мӯҳлатҳои гуногуни ҷазо маҳкум гардида буданд.
Худи Сафармад Рустамов тобистони соли гузашта боздошт шуда буд. Он замон чанде чунин мепиндоштанд, ки боздошти Рустамов ба бетартибиҳои оммавии мухлисони дастаи футболи «Равшан»-и Кӯлоб марбут аст. Баъдтар ин фарзия исботи худро пайдо накард.
