Дар чаҳорчӯби баргузории амалиёти «Кӯкнор-2012» кормандони Раёсати Агентии назорати маводи нашъаовари вилояти Суғд аз кӯшиши қочоқи маводи мухаддир ба кишварҳои узви Иттиҳоди Давлатҳои Мустақил ҷилавгирӣ намуданд.
Тавре ба ОИ «Азия-Плюс» аз АНМН хабар доданд, тибқи маълумоти расида кормандони фаврии раёсат дар хонаи иҷора дар шаҳри Хуҷанд сокини 36-солаи вилояти Хатлонро боздошт намуданд. «Зимни кофтукови хона ду бастаи селлофании дорои беш аз 3 кило маводи мухаддири афюн дарёфт ва мусодира гардид», – гуфтанд дар агентӣ.
Ба иттилои манбаъ, ошкор гардидааст, ки боздоштшуда маводи мухаддирро дар минтақаи ҷануби ҷумҳурӣ аз шаҳрванди Афғонистон дастрас карда, ба вилояти Суғд овардааст ва қисмате аз маводи мухаддирро дар хонаи иҷорааш дар шаҳри Истаравшан нигоҳ медоштааст.
«Худи ҳамон рӯз кормадони Раёсат манзили иҷораи ӯ дар шаҳри Истаравшанро мавриди кофтуков қарор дода, ҳудуди 1 кило героин ва 11 кило маводи мухаддири гурӯҳи каннабисро дарёфт ва мусодира карданд. Ҳамин тариқ, вазни умумии маводи нашъаовари мусодирашуда беш аз 14 килоро ташкил дод», – гуфт манбаъ.
Зикр гардид, ки аз рӯй ин далел парвандаи ҷиноӣ боз шуда, тафтишот идома дорад.
